اروپا اتفاقی طالبلرنینگ افغانستانده عیاللر و قیزلرگه قرشی آلیب باره‌یاتگن «کمسیتووچی سیاستلری»نی هېچ قنده‌ی شرطسیز بېکار قیلیشگه چقیردی.
اروپا اتفاقی بیاناتیده طالبان تامانیدن انسان حقوقلری‌نینگ بوزیلیشی، خصوصاً، عیاللر و قیزلرگه نسبتاً قۉللنه‌یاتگن کېسکین جندر کمسیتیلیشینی قاره‌له‌گن.
اروپا اتفاقی‌نینگ بیاناتیده ایتیلیشیچه، بو چاره‌لر عیاللر و قیزلرنینگ جماعت حیاتیده‌گی اشتراکینی کېسکین چېکلش همده اولرنی تعلیم آلیش، ایشلش و اېرکین حرکتلنیش حقوقی کبی انساني حقوقلریدن محروم قیلیش آرقه‌لی اولرنینگ عمومي احوالی نینگ ینه‌ده یامانلشیشیگه آلیب کېلگن.
بیاناتده شونده‌ی دېییله‌دی: «اروپا اتفاقی ۲۰۲۶-ییلده عیاللر و قیزلرنینگ حقوقلری باره‌سیده‌گی وضعیت‌نینگ ینه‌ده یامانلشه‌یاتگنیدن، خصوصاً، افغانستان قیزلر آلتینچی صنفدن کېین عمومي تعلیمدن محروم قیلینه‌یاتگن یگانه دولت اېکنیدن چوقور خواطرده. بو حالت ۲.۲ میلیوندن آرتیق قیزگه تأثیر کۉرسه‌تماقده. بیز اوشبو کمسیتووچی سیاستلرنی هېچ قنده‌ی شرطسیز بېکار قیلیشگه چقیره‌میز».
اوشبو بیانات اروپا اتفاقی‌نینگ اقتصادي همکارلیک و ترقیات تشکیلاتی (او‌اِی‌سی‌دی) همده بیرلشگن ملتلر تشکیلاتی نینگ تعلیم، فن و مدنیت مسأله‌لری بۉییچه تشکیلاتی (یونسکو)ده‌گی وکالت‌خانه‌سی تامانیدن اوشبو تشکیلاتلرنینگ افغانستانده‌گی فعالیتی یوزه‌سیدن اعلان قیلینگن.
اروپا اتفاقی یونسکونینگ عیاللر و قیزلر اوچون مقابل تعلیم یۉللرینی یره‌تیش باره‌سیده‌گی سعی-حرکتلرینی آلقیشله‌گن و «گرچه بونده‌ی امکانیتلر حاضرگی شرایطده ضرور بۉلسه-ده، اولر رسمي، اینکلیوزیو و صفتلی تعلیم نینگ اۉرنینی باسه آلمه‌یدی»، دېب تأکیدله‌گن.
اوشبو تشکیلات، شونینگدېک، ۲۰۲۵-ییلده یونسکو بیلن همکارلیکده افغانستانده کۉنیکمه‌لرنی رواجلنتیریش و سوادخوانلیک تعلیمی آرقه‌لی اقتصادي امکانیتلرنی کېنگه‌یتیریشگه قره‌تیلگن، قیمتی ۴.۷ میلیون یېورالیک لایحه‌نی باشله‌گنینی بیلدیرگن.
اروپا اتفاقی، مستقل رسانه و مدنی جماعه‌چیلیک تشکیلاتلری فعالیت یوریته‌یاتگن یاپیق و خوفلی محیطگه قره‌مه‌ی، افغانستان‌نینگ مستقل عامه‌وي اخبارات واسطه‌لری، انسان حقوقلری و عیاللر حقوقلری ساحه‌سیده فعالیت یوریتووچی تشکیلاتلر، شونینگدېک، انسان حقوقلری حمایه‌چیلرینی قطعي قۉللب-قوّتلشده دوام اېتیشینی بیلدیرگن.
اروپا اتفاقی، شونینگدېک، مدني میراثگه موجود تهدیدلر، ناقانوني قزیشمه‌لر و مدني بایلیکلرنینگ ناقانوني آلیب چیقیب کېتیلیشی دوام اېته‌یاتگنی، مدنیت ساحه‌سیده فعالیت یوریته‌یاتگن خادملر، خصوصاً، عیاللر خوفسیزلیگیگه تهدیدلر موجودلیگیدن جدّي خواطر بیلدیرگن.
