پاکستان باش وزیری‌نینگ اۉرین‌باسری و تشقی ایشلر وزیری محمد اسحاق‌دار افغانستان‌ده برقرارلیکنی تأمینلش منطقه‌ده تینچلیک و برقرارلیکنی سقلش اوچون ضرور اېکنینی ایتدی.
پاکستان تشقی ایشلر وزیری بوگون (سه‌شنبه، ۲۸-میزان) تاجیکستان‌ده بۉلیب اۉتگن شانگهای همکارلیک تشکیلاتی ییغینیده شونده‌ی دېدی: «پاکستان تینچ، برقرار، منطقوي انتیگراسیون‌گه اېگه و فراوان افغانستاننی قۉللب-قوّتلشده دوام اېته‌دی. بونده‌ی افغانستان اۉز ایچیده هم، قۉشنیلری بیلن هم تینچ-تاتوو یششی کېره‌ک.»
اونینگ ایتیشیچه، پاکستان افغانستان خلقی‌نینگ ترقیاتی و فراوانلیگینی قۉللب-قوّتلش اوچون صمیمي سعی-حرکتلرنی عملگه آشیرگن. بونینگ عوضیگه او طالبلر رژیمیدن فقط بیر نرسه‌نی طلب قیله‌دی: «افغانستان توپراغیدن پاکستان و دنیاگه قرشی تروریزم اوچون فایده‌لنیلمسلیگی.»
اسحاق‌دار شونینگدېک: «پاکستان منطقوي ترقیات و فراوانلیک‌نینگ اساسي پای‌دېواری صفتیده تینچ و برقرار قۉشنیچیلیککه صادقدیر»، دېدی.
طالبان افغانستان‌ده حاکمیتنی قَیته اېگه‌لله‌گنیدن بېری پاکستان خیبر-پختونخوا و بلوچستان ایالتلریده خوفسیزلیک معمالری همده ترورچیلیک هجوملری‌نینگ سېزیلرلی درجه‌ده کوچه‌ییشیگه گواه بۉلدی.
پاکستان رسميلری اوشبو هجوملر افغانستان حدودیدن عملگه آشیریله‌یاتگنینی دعوا قیلماقده. بیراق افغانستانده‌گی طالبلر بو دعوالرنی رد اېتیب، هېچ بیر گروهگه افغانستان توپراغیدن باشقه مملکتلرگه قرشی فایده‌لنیشگه رخصت بېرمسلیگینی اَیتماقده.
ترورچی گروهلرنینگ موجودلیگی باره‌سیده‌گی ترنگلیک بیر ییلدن آرتیق وقت دوامیده طالبلر و پاکستان مناسبتلرینی کېسکینلشتیریب، ایکّی تامان اۉرته‌سیده‌گی قانلی تۉقنه‌شوولر همده چېگره‌لرنینگ یاپیلیشیگه سبب بۉلدی.
