«هندوکوش آوازی» ناملی، طالبلر استخباراتیگه علاقه‌دار عاموی اخبارات واسطه‌‌سی افغانستان نینگ سابق حکومتی دوریده پولیس قوماندانلریدن بیری بۉلگن الله‌داد فدایی‌نینگ حبسگه آلینگنینی تصدیقله‌دی. اوشبو ییتکرمه اودیو پیاملرنی نشر قیلیب، فدایی سمیع سادات باشچیلیگیده‌گی «افغایستان بیرلشگن جبهه‌سی» اوچون ایشله‌گنینی دعوا قیلگن. بیراق مذکور جبهه اعلان قیلینگن اودیو پیاملرنی «ساخته و صنعی یولداش یاردمیده تیارلنگن» دېب اته‌گن.
«هندوکوش آوازی» بوگون (شنبه، 16 عقرب) ایکس اجتماعي ترماغیده بیر نېچته پُست نشر قیلیب، فدایی «بیر مدت اوّل خوفسیزلیک کوچلری (طالبان اعضالری) تامانیدن حبسگه آلینگنینی» یازگن.
شونینگدېک، اوشبو ییتکرمه الله‌داد فدایی‌گه تېگیشلی اېکنی ایتیله‌یاتگن بیر نېچته اودیو پیاملرنی نشر قیلگن. نشرنینگ دعوا قیلیشیچه، بو اودیوپاملر فدایی‌و «افغایستان بیرلشگن جبهه‌سی» رهبری سمیع سادات اۉرته‌سیده نورستان و لغمان ولایتلریده طالبلرگه قرشی هجوملر اویوشتیریش مسأله‌سیده المشیلگن.
«هندوکوش آوازی» سمیع ساداتگه تېگیشلی اېکنی ایتیله‌یاتگن ینه بیر اودیو پیامنی هم ترقه‌تگن. اونده «بیر قۉشنی» بیلن امکانیتلر و حربي جهازلرنی قۉلگه کیریتیش بۉییچه کېلیشوو حقیده سۉز باره‌دی. شونینگدېک، «حبیب اسملی شخص باجور و خیبرپختونخوا نینگ دیر حدودیدن نورستان و کنر ولایتلریگه آلیب باره‌دیگن، فایده‌لنیش ممکن بۉلگن بیرار یۉل بار-یۉقلیگینی تېکشیره‌یاتگنی» ایتیله‌دی.
«افغانستان بیرلشگن جبهه‌سی» ایمکس اجتماعي ترماغیده بیانات نشر قیلیب، مذکور اویدیو پیاملرنی «ساخته و صنعي یولداش یاردمیده یره‌تیلگن» دېب اته‌گن.
جبهه بیاناتیده ایتیلیشیچه، «اوشبو خبرلر ساخته‌لشتیریش، بهانه یره‌تیش و جماعتچیلیک فکرینی چلغیتیش جریانی‌نینگ دوامی صفتیده تیارلنگن. ظالم رژیم اولردن افغانستان‌نینگ سابق مدافعه و خوفسیزلیک کوچلری وکیللرینی ینه‌ده کۉپراق تعقیب قیلیش، حبسگه آلیش و قییناققه سالیش اوچون بهانه یره‌تیش مقصدیده فایده‌لنیشگه اورینماقده».
«افغانستان بیرلشگن جبهه‌سی» الله‌داد فدایی نینگ اوشبو جبهه بیلن علاقه‌سی بار-یۉقلیگی حقیده ایضاح بېرمه‌گن. شونینگدېک، بیاناتده اونینگ نامی تیلگه آلینمه‌گن.
اوّلراق اَیریم ییتکرمه‌لر طالبلر جاري هجري-شمسي آی نینگ باشیده الله‌داد فدایینی کاباده‌گی اوییدن حبسگه آلگنی حقیده خبر بېرگن اېدی. بیراق طالبان حاضرگچه جناب فدایی نینگ حبسگه آلینگنینی رسماً تصدیقله‌مه‌گن.
الله‌داد فدایی افغایستان‌نینگ سابق حکومتی دوریده میدان وردک، لغمان، نیمرۉز و بغلان ولایتلریده امنیه قوماندانی لوازمیده ایشله‌گن.
طالبلر افغانستان‌ده حاکمیتنی قَیته اېگه‌له‌گنیدن سۉنگ او ایرانگه کېتگن اېدی. بیراق اونینگ عیناً قچان و قنده‌ی شرایطده افغانستانگه قَیتگنی حاضرچه نامعلوم.
