کانادا ییتکرمه‌لری اوشبو مملکت مهاجرت اداره‌سی افغانستاندن بۉلگن اۉسمیر قیزنینگ تۉلیق تحصیلی بورسیه قۉلگه کیریتگنیگه قره‌مه‌ی، اونینگ اۉقیش اوچون رخصت‌نامه آلیش حقیده‌گی عریضه‌سینی رد اېتگنی حقیده خبر بېرماقده.
سی‌بی‌سی رادیوسی نینگ خبر بېریشیچه، ۱۸ یاشلی قیز جاري ییل نینگ اپرېل آییده بریتانیا کولمبیاده‌گی مکتب-انترناتدن ایکّی ییللیک تعلیم آلیش اوچون قبول خطینی آلگن. اوشبو بورسیه اونینگ برچه اۉقیش و یشش خرجتلرینی تۉلیق قاپله‌گن.
ییتکرمه خبریگه کۉره، کانادا مهاجرت اداره‌سی جولای آییده بو قیزنینگ عریضه‌سینی رد اېتگن. اداره بونگه سبب صفتیده «اونینگ یشش مدتی توگه‌گچ، افغانستانگه قَیتیشیگه ایشانچ حاصل قیلینمه‌گنی» همده «کاناداده اۉقیش و یشش خرجتلرینی قاپلش اوچون یېترلی مالیوي مبلغگه اېگه اېمسلیگی»نی کۉرسه‌تگن.
۱۸ یاشلی قیز شونده‌ی دېگن: «قبول قیلینگنیم حقیده‌گی دستلبکی خطنی آلگنیمده، خَیالیمده حیاتیم اوچون مطلقا ینگی رېجه و ینگی استقبال پیدا بۉلگن اېدی. بو یۉل مېنی کېله‌جگیم سری یېته‌کلشی ممکن اېدی. برچه سعی-حرکتلریم اۉز ثمره‌سینی بېرگنینی بیلردیم».
اونینگ ایتیشیچه، طالبلر حاکمیتگه قَیتگنیدن بېری یشیرین روشده تحصیل آلیب کېلگن و کاناداده‌گی بورسیه اونینگ مکتب تعلیمینی یکونلشی همده یخشیراق کېله‌جک قوریشی اوچون سۉنگگی امکانیت بۉلیشی ممکن.
او کانادا حکومتیدن قرارینی قَیته کۉریب چیقیش و عریضه‌سینی ینه بیر بار تېکشیریشنی سۉره‌گن.
اوشبو اۉسمیر قیز اوچون تحصیلی بورسیه کانادا نینگ بریتانیا کولمبیا پرووینسیه‌سیده‌گی اۉرته مکتبلر بیلن همکارلیک قیلووچی «اېرتنگی کون عیال یېتکچیلری» ناملی ناتجارت تشکیلات تامانیدن تقدیم اېتیلگن.
مذکور تشکیلات «چېکسیز تفکرنی رواجلنتیریش» ناملی دستور آرقه‌لی افغانستانلیک قیزلرگه تعلیم آلیش امکانیتلرینی یره‌تیب کېله‌دی.
تشکیلات معلوماتیگه کۉره، جاري ییلده اوشبو دستور اوچون تنلب آلینگن اوچ نفر قیزدن ایکّی نفری نینگ اۉقیش رخصت‌نامه‌سینی آلیش حقیده‌گی عریضه‌سی رد اېتیلگن، اوچینچی قیز نینگ عریضه‌سی بۉییچه اېسه حاضرچه انیق قرار یۉق.
تشکیلات نینگ اجراچی مدیری فریبا رضایی کانادا حکومتی نینگ قرارینی حیرتلنرلی دېب اته‌گن. اونینگ ایتیشیچه، دولت خدمتچیلری عریضه‌لرنی یېترلیچه سینچیکلب تېکشیرمسدن و تقدیم اېتیلگن حجتلرنی تۉلیق اۉرگنمسدن رد اېتماقده.
اونینگ تأکیدلشیچه، کانادا مهاجرت اداره‌سی قیز نینگ تۉلیق تحصیلی بورسیه‌نی آلگنیگه هم اعتبار قره‌تمه‌گن.
کاناپا مهاجرت اداره‌سی«سی‌بی‌سی»گه بېرگن معلوماتیده برچه اۉقیش اوچون رخصت‌نامه آلیش عریضه‌لری تقدیم اېتیلگن معلوماتلر اساسیده علیحده ترتیبده کۉریب چیقیلیشینی بیلدیرگن.
اداره.نیتگ قۉشیمچه قیلیشیچه، مهاجرت خادملری طلبگار نینگ اۉقیش اوچون رخصت‌نامه آلیش شرطلریگه جواب بېریشی یاکه بېرمسلیگینی، شونینگدېک، موجود دلیللر اساسیده کاناداذمهاجرت قانون-قاعده‌لریگه رعایه قیلیش احتمالینی انیقلش اوچون ایش نینگ برچه جهتلرینی اۉرگنه‌دی.
مهاجرت بۉییچه ادواکت گبریېل طبا اوشبو افغانستانلیک قیزنینگ عریضه‌سی یېترلیچه سینچیکلب کۉریب چیقیلمه‌گن بۉلیشی احتمالدن خالی اېمسلیگینی ایتگن.
اونینگ تأکیدلشیچه، کانادا مهاجرت اداره‌سی عریضه‌لرنی بهالشده «چیناک» دېب ناملنگن اتوماتلشتیریلگن دستوردن فایده‌لنه‌دی. احتمال، اوشبو دستور تحصیلیگه عاید معلوماتلرنی انیقله‌ی آلمه‌گن بۉلیشی ممکن.
کانادا مهاجرت اداره‌سی اَیریم حاللرده عریضه‌لرنی دستلبکی سره‌لش، عادتي ایشلرنی انیقلش، خادملر اوچون قیسقه‌چه معلومات تیارلش و چه‌تباتلر آرقه‌لی طلبگارلر نینگ سواللریگه جواب بېریش کبی وظیفه‌لرده صنعی یولداش واسطه‌لریدن فایده‌لنیشینی معلوم قیلگن. بیراق یکوني قرار قبول قیلیش صنعي اینتېلېکت ذمّه‌سیگه یوکلنمسلیگینی تأکیدله‌گن.
اداره «چیناک» صنعي یولداش اېمسلیگینی، بلکه طلبگارلر حقیده‌گی معلوماتلرنی سادّه‌لشتیریش و اولرنی ویزوه‌ل طرزده نمایش اېتیش اوچون ایشلب چیقیلگن اکسیل دستوریگه اساسلنگن واسطه اېکنینی قید اېتگن.
اداره‌‌نینگ بیلدیریشیچه، «چیناک» قرار قبول قیلمه‌یدی و مهاجرت خادملریگه هېچ قنده‌ی قرار قبول قیلیشنی هم توصیه اېتمه‌یدی.
مهاجرت بۉییچه وکیل مدافع‌نینگ ایتیشیچه، محکمه‌گه مراجعت قیلیش و حقوقي دعوا قۉزغه‌تیش آرقه‌لی اوشبو قیزگه اۉقیش اوچون رخصت‌نامه بېریلیشیگه اېریشیش ممکن. بیراق «اېرتنگی کون عیال یېتکچیلری» تشکیلاتی بونده‌ی حقوقي جریاننی باشلش اوچون مبلغی یۉقلیگینی بیلدیرگن.
شو بیلن بیرگه، کانادا پارلمانی‌نینگ افغانستان بۉییچه مخصوص کمیته‌سی ۲۰۲۲-ییلده فدرا‌ل حکومتگه کانادادن تۉلیق تحصیلی بورسیه قۉلگه کیریتگن افغانستانلیک فقرالرگه اولر نینگ کېلیب چیقیش مملکتیگه قَیتیش نیتینی بهاله‌مسدن اۉقیش اوچون رخصت‌نامه بېریشنی توصیه قیلگن اېدی.
طالبلر افغانستانده حاکمیتنی قَیته اېگه‌له‌گنیدن بېری آلتینچی صنفدن یوقاری باسقیچلرده قیزلرنینگ تعلیم آلیشینی تعقیقلب کېلماقده. اوشبو قرار عاقبتیده ۲.۵ میلیوندن آرتیق قیز تعلیم آلیش امکانیتیدن محروم بۉلگن.
بو دورده اَیریم قیزلر دنیانینگ تورلی مملکتلریدن تحصیلی بورسیه‌لرینی قۉلگه کیریتیب، اۉقیشنی دوام اېتتیریشگه موفق بۉلگن. بیراق مکتب یاشیده‌گی قیزلر نینگ اکثریتی اوچون بونده‌ی امکانیتلردن فایده‌لنیش امکانی بۉلمه‌گن.
