پولند پولیسی شنبه کونی مملکت‌نینگ ایکّینچی ییریک شهری کراکوف نینگ تاریخي مرکزیده قوراللنگن اېرکک تامانیدن صادر اېتیلگن آتیشمه عاقبتیده بېش کیشی هلاک بۉلگنی و ۱۲ کیشی یره‌لنگنینی معلوم قیلدی.
فرانس پرس اخبارات آژانسی‌نینگ خبر بېریشیچه، پولند پولیسی بیر اېرکک موترده کراکوف شهری‌نینگ باش میدانیگه کیریب کېلیب، آدملرگه قره‌ته اۉق اوزگنینی بیلدیرگن.
پولیس معلوماتیگه کۉره، خادملر گمانلنووچیگه قره‌ته اۉق اوزگن و او حاضر حبسده سقلنماقده.
کراکوف پولیسی مطبوعات سوزلاوچیسی فرانس پرنس آژانسی بېرگن صحبتیده: «اوشبو حادثه عاقبتیده بېش کیشی هلاک بۉلدی، ۱۲نفرگه یقین کیشی یره‌لندی»، دېدی.
پولند منطقوي پولیسی ایکس اجتماعي ترماغیده‌گی بیاناتیده: «هجومچی پولیس تامانیدن اۉققه توتیلدی»، دېب معلوم قیلدی. شوندن سۉنگ او شفاخانه‌گه آلیب کېتیلگن.
تخمیناً ۶۰ یاشلی بیر عیال فرانسه پرس آژانس ی: «مېن آدملرگه قره‌ته اۉق اوزه‌یاتگن و میدانده یوره‌یاتگن اېرککنی کۉردیم»، دېدی.
او قۉشیمچه قیلیب: «بو کراموف اوچون فاجعه. بیز ایلگری هېچ قچان بونده‌ی حادثه‌گه گواه بۉلمه‌گنمیز»، دېیه تأکیدله‌دی.
پولند باش وزیری دونالد توسک اوشبو حادثه‌نی «فاجعه‌لی آتیشمه» دېب اته‌ب: «پولیس گمانلنووچی نینگ اۉتمیشی و اوشبو هجوم نینگ برچه تفصیلاتلرینی اۉرگنماقده»، دېدی.
پولندنینگ محافظه‌کار و ملتچی جمهور رئیس کارول ناوروکی ایکس اجتماعي ترماغیده‌گی خبریده تېگیشلی رسميلر بیلن علاقه‌ده اېکنینی و «اوشبو دهشتلی واقعه‌لر بیلن باغلیق وضعیت یوزه‌سیدن تۉلیق ایضاح» کوته‌یاتگنینی بیلدیردی.
او قۉشیمچه قیلدی: «پولند فقرالری خوفسیزلیگی مطلق اوستوار وظیفه‌دیر».
پولندنینگ جَنوبیده جایلشگن تاریخي کراکوف شهری ایلگری مملکت پایتختی بۉلگن و هر ییلی میلیونلب سیاحلرنی اۉزیگه جلب قیله‌دی.
۳۸ میلیون اهالیگه اېگه، اروپا اتفاقی و شمالي اتلانتیکه شرطنامه‌سی تشکیلاتی (ناتو) اعضاسی بۉلگن پولندده آدملر اۉلیمیگه سبب بۉله‌دیگن آتیشمه‌لر کمدن کم صادر بۉله‌دی.
شونگه قره‌مه‌ی، اکتوبر آییده بیر نېچه پیچاقلی هجوملر صادر اېتیلگنیدن سۉنگ، مملکتده خوفسیزلیک بۉییچه شَیلیک درجه‌سی آشیریلگن اېدی.
دونالد توسک اوّلراق اوشبو حادثه‌لرنی «زۉرآورلیک مدنیتی» دېب تعریفله‌گن اېدی.
۲۰۲۲-ییلده روسيه نینگ اوکراین‌گه کېنگ کۉلملی باستیریب کیریشیدن بویان کي‌یف نینگ قطعي اتفاقچیلریدن بیری بۉلیب کېله‌یاتگن پولند پایتختی ورشوه روسيه نینگ پولند حدودیده‌گی قۉپارووچیلیک حرکتلری و گیبرید اوروشی حقیده بیر نېچه بار آگاهلنتیرگن. مسکو اېسه بو عیبلاولرنی رد اېتیب کېله‌دی.
