ایراننینگ خاتم الانبیا مرکزي قرارگاهی امریکا جمهور رییسی دونالد ترامپنینگ بیاناتیگه جوابن، «امریکانینگ هرمز بۉغازی باشقروویگه ارهلشیشیگه هېچ قچان رخصت بېرمهیمیز و بېرمهیمیز هم»، دېدی.
صداوسیما خبریگه کۉره، قرارگاه ایران قوراللی کوچلری مملکت بېلگیلهگن یۉنهلیشدن تشقریده هرمز بۉغازی آرقهلی حرکتلنهیاتگن کېمه و نفت تانکرلرینینگ قتناویگه عاید هر قندهی ترتیببوزرلیک و خوفسیزلیککه تهدیدگه قطعي مناسبت بیلدیریشینی معلوم قیلگن.
قرارگاه بیاناتیده ایتیلیشیچه، «امریکانینگ هرمز بۉغازی باشقروویگه ارهلشیشگه قرهتیلگن تکراري سرگذشتلری و تجاوزکار حرکتلری منطقه خوفسیزلیگی، خلقارا تجارت همده نفت و تجارت کېمهلرینینگ قتناوینی جدّي خوف آستیگه قۉیماقده. افسوسکی، اَیریم منطقه دولتلرینینگ همکارلیگی اوروشنینگ بوتون منطقهگه یاییلیش خوفینی ینه-ده کوچهیتیردی.»
بوندن آلدین دونالد ترامپ امریکا هرمز بۉغازینی حمایه قیلیشی و اونینگ خوفسیزلیگینی تأمینلش خرجتلرینی کېمهلردن اوندیریشینی معلوم قیلگن اېدی.
امریکا جمهور رییسی، شونینگدېک، هرمز بۉغازی آچیق اېکنینی و ایران بیلن یاکه ایرانسیز هم آچیق قالیشینی تأکیدلهگن.
ایران اسلام انقلابی قۉریقچیلری کېچه امریکا بیلن ماجرا کوچهیگنیدن سۉنگ، «هرمز بۉغازی کېینگی آگاهلنتیریشگچه و امریکانینگ منطقهدهگی ارهلشووی توگهگونیگه قدَر یاپیلدی همده هېچ بیر کېمه حرکتلنه آلمهیدی»، دېب اعلان قیلگن اېدی.
خاتم الانبیا مرکزي قرارگاهی ینگی بیاناتیده منطقه دولتلری رهبرلرینی هم امریکا بیلن همکارلیک قیلیشدن آگاهلنتیردی.
بیاناتده شوندهی دېییلهدی: «منطقه دولتلری رهبرلریگه آگاهلنتیرهمیزکی، امریکا بیلن هر قندهی همکارلیک و اونینگ تجاوزکار اوردوسیگه لاگیستیکه یاردمی کۉرسهتیش اېران حاکمیتی و ملي خوفسیزلیگیگه قرشی اوروش صفتیده بهالنهدی. اگر اوروش کېنگهیسه، اونینگ النگهسی بوتون منطقه دولتلرینی قمرهب آلهدی.»
قرارگاه، شونینگدېک، منطقهدهگی برچه بېقرارلیک و اوروشنینگ کېنگهییشی اوچون مسوولیت امریکا همده اونینگ اوردوسی بیلن همکارلیک قیلهیاتگن دولتلر ذمّهسیده اېکنینی بیلدیرگن.
امریکانینگ ایران حدودیگه اویوشتیرگن ینگی هجوملریدن سۉنگ، ایران امریکانینگ منطقهدهگی حربي پایگاهلریگه راکت و درون هجوملرینی قَیته باشلهگن. سۉنگّی کونلرده کمیده بېش منطقه دولتی حدودیدهگی امریکا پایگاهلری نشانگه آلینگنی ایتیلماقده.
مذکور دولتلر ایران هجوملرینی اۉز حاکمیتینینگ بوزیلیشی دېب بهالب، جواب قَیتریش حقوقینی سقلب قالیشینی بیلدیرگن. ایران اېسه فقط امریکا حربي پایگاهلرینی نشانگه آلهیاتگنینی و منطقه دولتلریگه هجوم قیلمهگنینی تأکیدلهماقده.
