«ایرانده انسان حقوقلری» تشکیلاتی «قصداً آدم اۉلدیریش» عیبی بیلن «قصاص‌نفس» جزاسیگه حکم قیلینگن افغانستان وطنداشی دار آستیده قتل اېتیلگنینی معلوم قیلدی.
اوشبو تشکیلات‌نینگ بیلدیریشیچه، مذکور شخص نینگ حکمی تیناوون (چهارشنبه، ۱۳عقرب) اېرته‌لب کرج شهریده‌گی قیزیل‌حصار قماقخانه‌سیده اجرا اېتیلگن.
«ایرانده انسان حقوقلری» تشکیلاتی گزارشیه ایتیلیشیچه، شخصی آشکار اېتیلمه‌گن اوشبو افغانستانلیک اېرکک ۱۴۰۳ییل نینگ سرطان آیی آخرلریده بنا خرجتلری بۉییچه کېلیب چیققن ماجرا وقتیده قۉشنیلریدن بیرینی اۉلدیرگن.
گزارش‌گه کۉره، تهران شهری‌نینگ میدان خراسان حدودیده بیر بناده یشاوچیلر اۉرته‌سیده بنا اوچون تۉله‌نه‌دیگن خدمت حقی مقداری یوزه‌سیدن کېلیشماوچیلیک یوزه‌گه کېلگن. اوشبو ماجرا عاقبتیده افغانستانلیک اېرکک اۉزی‌نینگ اېرانلیک قۉشنیسی «جواد» نینگ اۉلدیریلیشیده اشتراک اېتگن.
معلوماتلرگه کۉره، اوچ نفر افغانستانلیک اکه-اوکه جواد بیلن جنجللشگن و او پیچاق ضربه‌لری عاقبتیده هلاک بۉلگن. قاتللیک صادر اېتیلگنیدن سۉنگ، تهران پولیسی جنایت قیدیروو اداره‌سی‌نینگ ۱۰-بۉلیمی تېرگاوچیلری اوچ اکه-اوکه‌نی افغانستانگه قَیتیش اوچون بویوملرینی ییغیشتیره‌یاتگن وقتیده قۉلگه آلگن.
اساسي عیبلنووچی تېرگاو جریانیده اولدیریلگن شخص بیلن بنا خرجتلری یوزه‌سیدن کېلیشماوچیلیک بۉلگنینی ایتگن. اونینگ سۉزلریگه کۉره، جواد اولرنینگ اویی اېشیگینی تېپیب، آنه‌سی بیلن جنجللشگنیدن سۉنگ، اوکه‌سی اونگه پیچاق بیلن ضربه بېرگن، اۉزی هم جنجلگه اره‌لشگن.
تېرگاو ایشلری یکونلنگچ، ایش تهران جنایت ایشلری بۉییچه محکمه نینگ یېتّینچی بۉلیمیده کۉریب چیقیلگن. عیبلنووچی مقتول‌نینگ عایله‌سی طلبیگه بناءً «قصاص نفس» جزاسیگه حکم قیلینگن. ایران عالي محکمه‌سی حکمنی تصدیقله‌گنیدن سۉنگ، جزا اجرا اېتیلگن.
