پاکستان پولیسی کراچیدهگی «اردوگاه رنجرز»ده اویوشتیریلگن قانلی هجومنینگ باش رېجهلشتیرووچیسی دېب گمان قیلینهیاتگن محمد بشیر قۉلگه آلینگنینی معلوم قیلدی.
جیو نیوز خبریگه کۉره، کراچی تروریزمگه قرشی کورهش ادارهسی باشلیغی عرفان بهادر بوگون (سهشنبه، ۲۳-سرطان) اۉتکزیلگن مطبوعات انجمنیده محمد بشیر ترورچیلرگه قورال یېتکزیب بېرگن قورال قاچاقچیلری بیلن بیرگه حبسگه آلینگنینی ایتدی.
اونینگ سۉزلریگه کۉره، مذکور هجوم افغانستانده رېجهلشتیریلگن و اونی عملگه آشیریش بۉییچه کۉرستمهلر هم شو یېردن بېریلگن.
عرفان بهادرنینگ ایتیشیچه، محمد بشیر۱۳ نفر یاردمچی بیلن بیرگه کراچیدهگی «اردوگاه رنجرز»گه هجوم اوچون برچه لجستیکیایشلرینی موافقلشتیرگن.
او هجومنی «جنان، هادی، عمر و عثمان» اسملی تۉرت جنگری عملگه آشیرگنینی، اولر افغانستاندن کراچیگه کیریب کېلگنینی بیلدیردی.
بهادرنینگ تأکیدلشیچه، جنان لاگېر دروازهسی آلدیده اۉزی بیلن آلیب کېلگن پارتلاوچی مادّهلرنی پارتلتگن، شوندن سۉنگ قالگن اوچ هجومچی لاگېر حدودیگه کیریب، قوراللی تۉقنهشوونی باشلهگن.
کراچی تروریزمگه قرشی کورهش ادارهسی باشلیغی قۉلگه آلینگن یرهدار هجومچی عثمان تېرگاو دوامیده هجومچیلر افغانستاندهگی تورلی اردوگاهلرده تیارگرلیکدن اۉتگنینی تن آلگنینی ایتدی.
اونینگ قۉشیمچه قیلیشیچه، تېرگاوچیلر هجومگه تیارگرلیک جریانی عکس اېتگن ویدېولرنی همده «جماعت الاحرار» گروهی اۉقوو اردوگاهیده یازیب آلینگن بیاناتلرنی قۉلگه کیریتگن.
جیو نیوز خبریگه کۉره، سیند ولایتی ایچکی ایشلر وزیری ضیاءالحسن لنجارهم مطبوعات انجمنیده هجومچیلرنینگ اوچ نفری افغانستان یشاوچیسی، ینه بیری اېسه خیبر پختونخوانینگ باجور منطقهسیدن بۉلگنینی ایتدی.
اونینگ سۉزلریگه کۉره، هجومنی باشقرگن شخصلر عملیاتنی افغانستان حدودیدن توریب باشقرگن. رنجرز کوچلری اۉتکزگن عملیات دوامیده اوچ هجومچی اۉلدیریلگن، تۉرتینچیسی اېسه یرهدار حالده قۉلگه آلینگن.
کراچیدهگی رنجرز لاگېری جاري ییل۲۷-جون کونی هجومگه اوچرهگن. حادثه عاقبتیده اوچ نفر پاکستان خوفسیزلیک خادیمی هلاک بۉلگن، ینه تۉرت نفری یرهلنگن.
هجوم اوچون جوابگرلیکنی «جماعت الاحرار» گروهی، یعنی پاکستان طالبانی حرکتی (تیتیپی) نینگ بۉلینمهلریدن بیری ذمّهسیگه آلگن.
مذکور هجوم و باشقه اَیریم هجوملردن سۉنگ، پاکستان اوردوسی افغانستان نینگ اوچ ولایتیدهگی نشانلرگه هوا ضربهلری بېرگنینی و تیتیپی همده «جماعت الاحرار» موضعلرینی نشانگه آلگنینی دعوا قیلگن.
افغانستاندهگی طالبان اېسه اوشبو بامباردمانلرده تینچ اهالی اویلری نشانگه آلینگنی، عاقبتده۳۶ نفر تینچ یشاوچی هلاک بۉلگنی و۱۶۳ نفری یرهلنگنینی بیلدیرگن.
