قیزلر مکتبدن محروم اېتیلگن بیر پیتده، طالبلرنینگ معارف وزیرلیگی صفتنی تأمینلش بۉییچه وزیر اۉرینباسری عبدالخالق صادق افغانستانده «قیرق ییلدن بویان تعلیم و ترقیات اوچون اېنگ یخشی شرایط یرهتیلگنینی» دعوا قیلدی.
او ۱۴۰۵-ییلگی کانکور امتحانیده یوقاری نتیجه کۉرستگن اۉقووچیلرنی تقدیرلش مراسمیده طالبان بوتون مملکت بۉیلب خوفسیزلیکنی تأمینلب، «یشاوچیلر اوچون یشش، تعلیم آلیش و رواجلنیش اوچون قولهی شرایط یرهتگنینی» ایتدی.
بیراق طالبلر قریب بېش ییلدن بویان قیزلر نینگ ۶-صنفدن یوقاری تعلیم آلیشینی منع قیلیب، بیلیم یورتلری و طبیات موسسهلری اېشیکلرینی هم اولر اوچون یاپیب قۉیگن.
بیرلشگن ملتلر تشکیلاتی معلوماتلریگه کۉره، اوشبو منع قیلیش طفیلی۲.۵میلیوندن آرتیق افغانستان قیزلری تعلیم آلیش امکانیتیدن محروم بۉلگن.
طالبلر قیزلر اوچون مکتب و بیلیم یورتلرنی یاپیش بیلن بیرگه، مملکت بۉیلب دیني و جهادي مدرسهلر قوریلیشینی کېنگهیتیرگن همده هر بیر ولایت مرکزیده ییریک جهادي مدرسه تشکیل اېتیشگه حرکت قیلماقده.
اۉتگن ییلی یونیسف و یونسکو افغانستاندهگی تعلیم حالتی بۉییچه قۉشمه حساباتیده باشلنغیچ تعلیم دستوریگه کتّه اۉزگرتیریشلر کیریتیلیشی رېجهلشتیریلهیاتگنینی معلوم قیلگن اېدی.
گزارشگه کۉره، ینگی اۉقوو دستوریده اسلامي مضمونلر هفتهلیک درس ساعتلرینینگ قریب یرمیگه تېنگ بۉلهدی. بو اېسه دیني تعلیم اولوشی سېزیلرلی درجهده آشیریلیشینی انگلهتهدی.
یونیسف و یونسکو افغانستاندهگی تعلیم صفتی کېسکین یامانلشهیاتگنینی تشویشلی حالت دېب بهالهگن.
گزارشده قید اېتیلیشیچه،۱۰ یاشلی بالهلرنینگ۹۰ فایزدن آرتیغی عادي متننی اۉقي آلمهیدی. بو اېسه افغانستانده دنیادهگی اېنگ آغیر تعلیم بحرانلریدن بیری یوزهگه کېلگنینی کۉرسهتهدی.
بیرلشگن ملتلر تشکیلاتینینگ تأکیدلشیچه، افغانستان تعلیم تیزیمی مثلی کۉریلمهگن معمالر بیلن یوزمه-یوز توریبدی.
