محلي منبعلرنینگ معلوم قیلیشیچه، طالبلر کوچلری غور ولایتینینگ فیروزکوه شهری و مرغاب اولسواللیگیده سکّیز نفر سابق بلند مرتبهلی رسمیلر و حربينی حبسگه آلگن.
منبعلرگه کۉره، حبسگه آلینگنلر آرهسیده شهیدلر و معلوللر ریاستینینگ سابق باشلیغی گُل احمد رستمي، فیروزکوه شهر حاکملیگی نینگ اوچینچی ناحیه سابق مدیری سید رحمان رحماني، چېگرهلر و قبیلهلر ایشلری بۉییچه اداره سابق باشلیغی موسا فدايی، اېکینچیلیک ریاستی درآمدلر بۉلیمی نینگ سابق مدیری ضیاوالحق جویا، ملي خوفسیزلیک باشقرمهسی نینگ سابق خادیمی فضل احمد، غور ولایتی پولیسی نینگ سابق افسری نقیبالله همده جمهوریت دوریدهگی سابق حربيلر محمد صالح و محمد حیدر بار.
منبعلر نینگ ایتیشیچه، موسا فدايی و ضیاوالحق جویا تیناوون توشدن کېین فیروزکوه شهریدهگی ایش جایلریدن حبسگه آلینگن. محمد حیدر اېسه قرینداشینی کۉریش اوچون مرغاب اولسواللیگگه بارگنیده قۉلگه توشگن. محمد صالح و فضل احمد اۉز قیشلاقلریده، گُل احمد رستمي، سید رحمان رحماني و نقیبالله اېسه مرغاب بازاری منطقهسیده حبسگه آلینگن.
حبسگه آلینگنلر نینگ عایله اعضالری اولر نینگ تقدیری یوزهسیدن غور والیسی ادارهسی، طالبلر استخبارات باشقرمهسی و ولایت پولیسسیگه مراجعت قیلگن. اولرگه طالبلر لوا بو حبسلرنی مستقل روشده عملگه آشیرگنی و باشقه ادارهلر بو مسألهگه ارهلشه آلمهسلیگی ایتیلگن.
عایله اعضالری کېینچهلیک طالبلر لواسیگه هم مراجعت قیلگن، بیراق لوا مسووللری اولر بیلن اوچرهشیشدن باش تارتگن و حبسگه آلینگنلر حقیده معلومات بېرمهگن.
حاضرچه طالبلر اوشبو شخصلر قندهی سبب بیلن حبسگه آلینگنی حقیده رسمي ایضاح بېرمهگن. غوردهگی محلي طالبلر رسميلری هم بو مسأله یوزهسیدن بیانات بېرمهگن.
طالبلر افغانستانده حاکمیتنی قَیته اېگهلهگنیدن بویان عمومي عفو اعلان قیلینگنینی دعوا قیلسه-ده، سابق عملدارلر و حربيلرنی بیر نېچه بار حبسگه آلگنی ایتیلماقده. گروه، شونینگدېک، سابق حکومت خادملریگه نسبتاً قییناق و سودسیز قتل حالتلری بۉییچه هم تنقید قیلینیب کېلماقده.
