ایران و امریکا اۉرتهسیدهگی تۉقنهشوولر کوچهییب بارهیاتگن بیر پیتده، ایران پارلمانی رئیسی و مذاکرهلر هیئتی رهبری محمد باقیر قالیباف نسبتاً باتفصیل بیانات بیلن چیقیب، اوروش و مملکتدهگی سۉنگّی وضعیت یوزهسیدن اۉز قرهشلرینی بیان قیلدی.
بوگون، چهارشنبه، 24-سرطان، ایران دولت یېتکرمهلریده نشر قیلینگن مراجعتده قالیباف شوندهی دېدی:
«اوّلا شونی بیلیشیمیز کېرهککی، بیز امریکا بیلن ماهیتاً و موجودلیگیمیزگه دخلدار اوروش حالتیدهمیز. اونینگ مقصدی نهفقط ایران اسلام جمهوریتی تیزیمینی اغدریش، بلکه مملکتیمیزنی پرچهلشدیر. دشمن نینگ بو استراتیژيسی اۉزگرمهگن.»
قالیبافنینگ تأکیدلشیچه، امریکا امکان تاپگن هر سفر ایرانگه ضربه بېریش و اۉز منفعتلرینی ایلگری سوریشگه اینتیلهدی. اونینگ فکریچه، بو سیاست اوروش یاکه مذاکره، یاخود امریکادهگی قَیسی جمهور رییس حاکمیتده اېکنیگه باغلیق اېمس. شو سببلی ایران هم اوروش و مذاکرهگه ملي منفعتلر همده ملي خوفسیزلیک نقطهٔ نظریدن، اوزاق مدتلی و رئال یاندشوو بیلن قرهشی لازم.
ایران پارلمانی رئیسی مملکتی هېچ قچان اوروشنی ایستهمهگنینی، بیراق هر دایم جنگگه تیار بۉلیشی و ملي خوفسیزلیک همده منفعتلرنی حمایه قیلیش اوچون آخریگچه کورهشیشی ضرورلیگینی تأکیدلهدی. شو بیلن بیرگه، او دیپلوماتيک و مذاکرهلردن هم فایدهلنیش کېرهکلیگینی قید اېتدی.
قالیباف امریکا بیلن مذاکرهلرنی تنقید قیلهیاتگنلرگه جوابن، حربي و دیپلوماتیک یۉللرنی اۉز ارا اویغونلشتیریش ضرورلیگینی، اوروش هم، مذاکره هم ملي منفعتلرنی حمایه قیلیش واسطهسی اېکنینی ایتدی.
اونینگ سۉزلریگه کۉره، حاضرگی باسقیچدهگی مذاکرهلر تسلیم بۉلیشنی انگلهتمهیدی، بلکه اوروش بیلن بیر قطارده قرشیلیک استراتیژيسی نینگ و ملي منفعتلرنی حمایه قیلیش نینگ بیر قِسمی حسابلنهدی. شونینگدېک، او دیپلوماتیک و مدافعه واسطهلریدن بیرگهلیکده فایدهلنیش ایران خوفسیزلیگینی تأمینلش اوچون مقرر ضرورت اېکنینی تأکیدلهدی.
قالیباف هرمز بۉغازی مسألهسیگه هم تۉختهلیب، 40 کونلیک اوروش دوریده بۉغازنی یاپیش قراری تۉغری بۉلگنینی ایتدی. اونینگ تأکیدلشیچه، بوگونگی کونده ایران نینگ ملي خوفسیزلیگی هرمز بۉغازیده ایران نظارتی سقلنیشی و تجارت کېمهلری نینگ خوفسیز همده تۉسیقسیز حرکتلنیشینی تأمینلش بیلن باغلیق.
سۉنگّی کونلرده ایران و امریکا اۉرتهسیدهگی ماجرا هرمز بۉغازی باشقرووی بۉییچه کېلیشماوچیلیکلر آرتیدن ینه اوج آلدی.
امریکا هجوملریدن سۉنگ ایران اسلام انقلابی قۉریقچیلری هرمز بۉغازی یاپیلگنینی اعلان قیلگن. بیراق امریکا بو سوو یۉلی آچیق قالهیاتگنینی و ایران اشتراک اېتیشی یاکه اېتمسلیگیدن قطعی نظر آچیق بۉلیب قالیشینی بیلدیرگن.
شونینگدېک، امریکا ایرانگه نسبتاً دېنگیز قملینی قَیته تیکلهگنینی معلوم قیلیب، ایران بندرلریدن کېمهلرنینگ چیقیشی یاکه اولرگه کیریشیگه رخصت بېریلمهیاتگنینی بیلدیرگن.
