ایران قوراللی کوچلری مرکزي “خاتم الانبیا” قرارگاهی سۉزلاوچیسی ابراهیم ذوالفقاری امریکا قۉشمه ایالتلرینی آگاهلنتیریب، اگر ایران آستقورمه انشاتلریگه هجوم قیلینسه، منطقهده قالگن آستقورمهلر هم نشانگه آلینیشینی معلوم قیلدی.
قرارگاه بوگون، پنجشنبه، ۲۵-سرطان، نشر قیلگن بیاناتیده، امریکا قۉشمه ایالتلری جمهور رییسی دونالد ترامپنینگ ایران آستقورمهلریگه ضربه بېریش حقیدهگی تهدیدلری عملگه آشیریلسه، ایران کوچلری منطقهدهگی برچه آستقورمهلرنی یکسان قیلیشینی بیلدیردی.
دونالد ترامپ ایران مذاکرهلر چوکیسیگه قَیتمسه، کېلهسی هفته امریکا قۉشمه ایالیتلری اوردوسی ایراننینگ الکتر ستشنلری و کۉپریکلرینی بامباردمان قیلیشینی ایتگن اېدی.
ایران و امریکا اۉرتهسیدهگی حربي تۉقنهشوولر جاري هفته ینه-ده کوچهیدی.
امریکا مرکزي قوماندانلیگی سنتکام سۉنگی هجوملر تۉلقینیده قوماندانلیک مرکزلری، هوا مدافعهسی تیزیملری، راکت و درون صلاحیتی همده ایران نینگ قیرغاق کوزهتوو انشااتلری نشانگه آلینگنینی معلوم قیلدی.
بیاناتگه کۉره، بوگون اېرتهلب امریکا کوچلری۹۰ دقیقهلیک عملیات دوامیده ایران نینگ کتّه تونب آرالیدهگی قیرغاق مدافعهسی تیزیملری و قناتلی راکت اۉبژېکتلریگه ضربه بېرگن.
ایران اېسه امریکانینگ ینگی هجوملریدن سۉنگ کویت و اردندهگی امریکا حربي پایگاهلرینی نشانگه آلگنینی معلوم قیلگن.
اردن رسميلری اېسه مملکت تامان اوچیریلگن سکّیزته ایران راکتی توتیب قالینگنینی بیلدیرگن.
ایران و امریکا اۉرتهسیدهگی ینگی تۉقنهشوولر هرمز بۉغازی اطرافیدهگی کېسکینلیک آرتیدن باشلنگن. امریکا ایراننی تجارت کېمهلریگه هجوم قیلیشده عیبلهماقده، تهران اېسه اۉز مقصدی هرمز بۉغازی اوستیدن نظارتنی سقلب قالیش اېکنینی تأکیدلهماقده.
“خاتم الانبیا” مرکزي قرارگای مطبوعات سۉزلاوچیسی ایران هېچ قندهی شرایطده امریکا کبی منطقهدن تشقریدهگی دولتنینگ هرمز بۉغازیگه ارهلشوویگه یۉل قۉیمسلیگینی و بو ایران نینگ مُراضاتسیز “قیزیل چیزیغی” اېکنینی تأکیدلهدی.
