طالبلر باش وزیری اقتصادي مسألهلر بۉییچه اۉرینباسرلیگی دفتری افغانستانده قالین تۉقیش صنعتینینگ تورلی باسقیچلریده قریب بیر میلیون کیشی فعالیت یوریتهیاتگنینی معلوم قیلدی.
مذکور اداره بوگون (شنبه،۲۷سرطان) نشر قیلگن ویدیو گزارشیده افغانستانده قالینچیلیک صنعتی اۉتگن ییللرگه نسبتاً رواجلنگنینی ادعا قیلدی.
حساباتگه کۉره، سۉنگگی بیر ییل ایچیده ۷۶۰ مینگ کوادرات متر قالین 14 میلیون امریکا دالری قیمتیده امریکا، کانادا، آسترلیا، روسيه، تورکيه، اَیریم اروپا، عرب و افریقا مملکتلریگه صادر قیلینگن.
طالبلرنینگ بیلدیریشیچه، مملکت ایچیده قالین تۉقیش صنعتی و سوداسینی قۉللب-قوّتلش مقصدیده خارجدن آلیب کیریلهدیگن قالین و شونگه اۉخشش محصولاتلرگه باجخانه تعریفهلری آشیریلگن، قالین ایشلب چیقریش اوچون ضرور خاماشیا وارداتیگه قۉییلگن سالیق و باجلر اېسه کمهیتیریلگن.
گزارشده ینه قید اېتیلیشیچه، قالین تۉقووچیلر و اوشبو ساحهده فعالیت یوریتهیاتگن تجارت کمپنیلرینی قۉللب-قوّتلش مقصدیده افغانستانده ایشلب چیقریلگن قالینلر کۉرگزمهلری مملکت ایچیده، شونینگدېک چین، اۉزبېکستان، هندستان، ایران، تورکمنستان و آذربایجانده تشکیل اېتیلگن.
