طالبلر افغانستانده کتابلرنی چاپ اېتیش، نشر قیلیش همده ساتیب آلیش و ساتیشگه قطعي چېکلاولر جاري اېتهیاتگن بیر پیتده، بیر گروه یاشلر انترنتده الکترون و اودیو کتابلر اوچون آچیق پلاتفورم صفتیده «پرستو» ناملی علاوهنی یرهتدی.
«پرستو» ناملی اوشبو اپ Parasto Incشرکتی تامانیدن ایشلب چیقیلگن بۉلیب، «گوگلپلی» و «اپل اپاستور» آرقهلی فایدهلنیش ممکن.
«پرستو» پروژهسی رهبری ذبیح مهدي اطلاعات روزگه معلوم قیلیشیچه، اپنی ایشلب چیققن کمپنی کاناداده یازمه و اودیو اثرلرنی نشر اېتووچی کمپنی صفتیده رسمي مجوز آلگن.
اونینگ ایتیشیچه، پرستو اودیو و الکترون کتابلر، حکایهلر، پادکستلر همده مدني مضموندهگی ماتریاللرنی فارسي، پشتو و اۉزبېک تیللریده تقدیم اېتووچی الکترونیک کتبخانهدیر.
مهدي نینگ سۉزلریگه کۉره، اپنی یرهتیشدن مقصد افغانستان اهالیسی و دنیادهگی فارسی زبانلر اوچون بیلیم، ادبیات همده مدني و صنعت اثرلریگه اېرکین کیریشنی کېنگهیتیریشدیر.
اونینگ قۉشیمچه قیلیشیچه، پرستو الکترون کتبخانهدن تشقری مدني و صنعت اثرلرینی تنیشتیریش همده تقدیم اېتیش بۉلیمینی هم ایشگه توشیریشنی رېجهلشتیرماقده. بو آرقهلی رسّاملر و مدني محصولاتلر یرهتووچیلری اۉزلری نینگ رسملری، میناتورلری، خطاطلیک نمونهلری، قالینلری، هنرمندچیلیک بویوملری، قۉلیازمهلری، نادر کتابلری و باشقه قیمتلی اثرلرینی نمایش اېتیشلری و تکلیف قیلیشلری ممکن بۉلهدی.
مهدينینگ ایتیشیچه، یازووچیلر و مدني محصولات یرهتووچیلری اوشبو اپده اۉز اثرلرینی قانوني روشده جایلشتیریشلری همده اولر نینگ ساتیلیشی و نتیجهلری بۉییچه گزارشلرینی کوزهتیشلری ممکن.
اونینگ تأکیدلشیچه، پرستو پلاتفورمهسیده کتابلر و باشقه رقملی مدني همده صنعت اثرلری فقط یازووچی، نشریات یاکه مؤلفلیک حقوقی اېگهسی نینگ راضیلیگی بیلن نشر قیلینهدی.
بوندن آلدین هم رقملی کتابلرنی تقدیم اېتووچی شونگه اۉخشش اپلر یرهتیلگن اېدی.
طالبان افغانستانده کتابلرنی چاپ اېتیش و نشر قیلیشگه چېکلاولر جاري اېتگنیدن سۉنگ، الکترون کتبخانهلر عامهلشه باشلهدی.
اطلاعات روز گزیتهسی اۉتگن ییلی نشر قیلگن سوریشتیرووگه کۉره، طالبان حکمرانلیگی نینگ دستلبکی تۉرت ییلی دوامیده مملکت بۉیلب۴۰۰ دن آرتیق عمومي نامدهگی کتاب همده یونیورسیتیلرده کمیده۶۷۹ ته درسلیک و علمي کتابنی منع قیلگن.
