پنجشیر ولایتیدهگی منبعلرنینگ ایتیشیچه، طالبلر پریان اولسواللیگیده اهالینینگ تاغلردهگی یازگی اویلرینی اېگهللب آلگن.
منبعلرنینگ اطلاعات روزگه معلوم قیلیشیچه، طالبلر «سرخشال، مهر و سمیر، کوهسار، شانیز و جشته» قیشلاقلری اهالیسینی یازگی اویلریدن مجبوری کۉچیرگن.
اولرنینگ سۉزلریگه کۉره، اوشبو قیشلاقلر اهالیسی هر یاز موسمیده چاروالرینی باقیش اوچون تاغ ییلاولریگه کۉچیب بارردی.
بیراق منبعلر طالبانگه قرشی پریانده یقینده صادر اېتیلگن هجومدن سۉنگ بو گروه اهالینی یازگی اویلریدن کوچ بیلن چیقریب یوبارگنینی اَیتماقده.
شونینگدېک، اَیریم منبعلرگه کۉره، طالبانگه قرشیلیک کۉرستگن اَیریم پنجشیر اهالیسی گروه اعضالری تامانیدن کلتکلنگن.
منبعلرنینگ بیلدیریشیچه، پریان تومنی حاکملیگی بناسیگه اویوشتیریلگن و مسوولیتینی «روندسبز» اۉز ذمّهسیگه آلگن هجومدن کېین طالبلر اولسواللیک اهالیسیگه نسبتاً قطعي چېکلاولر جاري قیلگن.
اولرنینگ ایتیشیچه، پنجشیرده طالبلرنینگ کۉچمه نظارت پوستهلری سانی کۉپهیگن، گروه جنگریلری قیشلاقلرده منتظم تېکشیروولر اۉتکزماقده.
طالبان ۲۰۲۱-ییلده پنجشیرده قوراللی قرشیلیککه دوچ کېلگن اېدی. شوندن کېین هم طالبلرگه قرشی کوچلر بو ولایتده فعالیت یوریتیشده دوام اېتگن. گروه پنجشیرده مخصوص حربي لوا جایلشتیرگن.
پنجشیر اهالیسی طالبلر تامانیدن جاري اېتیلگن قطعي چېکلاولر آستیده یشهماقده. گروه تاغلرگه چیقیشنی منع قیلگن، حالبوکه ولایت اهالیسی نینگ اکثریتی چارواچیلیک بیلن شغللنهدی و ییلاولرگه باریشگه محتاج. بوندن تشقری، طالبلر پنجشیرده تونگی حرکتلنیشگه هم چېکلاولر اۉرنتگن.
شونینگدېک، پنجشیر اهالیسینینگ طالبلر تامانیدن اۉزباشیمچهلیک بیلن حبسگه آلینهیاتگنی حقیده منتظم خبرلر بېریلماقده.
