کویت برق، سوو و قَیته تیکلنووچی انرژی وزیرلیگی ایران تیناوون کېتمه-کېت تۉرتینچی کون مملکتدهگی برق ترماقلری همده دېنگیز سووینی چوچوکلشتیریش انشااتلریگه هجوم قیلگنینی معلوم قیلدی.
«کویتتایمز» خبریگه کۉره، وزیرلیک بوگون (سهشنبه، ۳۰-سرطان) اعلان قیلگن بیاناتیده اوشبو هجوملر عاقبتیده بیر نېچته تاسیساتلرده یانغین یوزهگه کېلگنینی بیلدیردی.
وزیرلیکنینگ تأکیدلشیچه، فوق العاده وضعیت گروهلری اسکونهلرنی حمایه قیلیش و خدمتلر برقرارلیگینی سقلب قالیش مقصدیده احتیاط چارهسی صفتیده بیر نېچته بلاکلرنی وقتینچه خدمتدن چیقرگن.
شونینگدېک، یانغین اۉچیرووچیلر النگهنی نظارت آستیگه آلگنی، حاضرده ضرر کۉرگن تاسیساتلر و اسکونهلرنی ترمیملش همده یېتکزیلگن ضررنی برطرف اېتیش ایشلری دوام اېتهیاتگنی قید اېتیلگن.
ایران و امریکا اۉرتهسیدهگی ماجرا ینه اوج آلگنیدن بویان کویت ایران اسلام انقلابی قۉریقچیلری تامانیدن عملگه آشیریلهیاتگن کېنگ کۉلملی راکت و درون هجوملری نشانیگه ایلنگن.
امریکا ایران حدودیدهگی اَیریم کۉپریکلر، تېمیر یۉللر، تونللر و سوونی چوچوکلشتیریش تاسیساتلریگه ضربه بېرگنیدن سۉنگ، ایران جوابن کویتدهگی برق ترماقلری و سوونی چوچوکلشتیریش تاسیساتلریگه هجوم قیلگن.
ایران اوّلراق، اگر امریکا اونینگ آستقورمهلرینی نشانگه آلسه، منطقهدهگی برچه آستقورمه تاسیساتلرینی هم نشانگه آلیشی حقیده تهدید قیلگن اېدی.
