امریکا قۉشمه ایالتلرینینگ جمهور رییسی دونالد ترامپنینگ ایتیشیچه، امریکا یقین آرهده ایراننینگ اصفهان ولایتیدهگی نطنز هستهای انشااتی یقینیده جایلشگن «کوه کلنگ» یېرآستی مجموعهسینی نشانگه آلهدی.
ترامپ آق اویده ژورنالیستلر بیلن صحبت چاغیده، ایران سانتریفیوژلرنی اوشبو یېرآستی مجموعهسیگه کۉچیرگن بۉلیشی ممکنمی، دېگن سوالگه شوندهی جواب بېردی:«بۉلیشی ممکن. اما بو بارهده بیزده تصدیقلنگن و مستند معلوماتلری یۉق.»
او ینه شوندهی دېدی: «بیز او یېرگه ضربه بېرهمیز. احتمال، جوده تېز آرهده. عادتده بوندهی نرسهلرنی آلدیندن اعلان قیلمهیمن. اگر اولر بونگه تۉسقینلیک قیله آلهدی، دېب اۉیلهگنیمده، بونی ایتمهگن بۉلردیم.»
ترامپ نینگ تاکیدلشیچه، سانتریفیوژلرنینگ اۉزی مهم اېمس، اساسي مسأله هستهای ماتریاللر بۉلیب، امریکا عیناً اولرنی کوزهتماقده.
«کوه کلنگ» نطنز یورانیومنی باییتیش مجموعهسیدن تخمیناً ایکّی کیلومتر جَنوبده جایلشگن. سۉنگّی ییللرده او یېرده چوقور یېرآستی تونللری قوریلگنی سببلی، مذکور حدود ایران نینگ هستهای دستوریدهگی اېنگ مهم تاسیساتلردن بیریگه ایلنگن.
امریکا جمهور رییسی بوگونگی مطبوعات انجمنیده ینه شونی ایتدیکی، ایران مذاکره و اوچرهشوو اۉتکزیشنی جوده ایستهماقده. بیراق، اولر مضمونلی مذاکرهگه تیار بۉلمهگونچه، امریکا اوچرهشوو اۉتکزیشگه قیزیقمهیدی.
سۉنگّی هفتهلرده ایران و امریکا اۉرتهسیدهگی اوروش ینه اوج آلگن. خبرگه کۉره، ماجرا هرمز بۉغازی باشقرووی و اسلام آباد کېلیشووی اجراسی یوزهسیدن کېلیشماوچیلیک آرتیدن باشلنگن.
اوروش قَیته باشلنگنیدن سۉنگ، ایران هرمز بۉغازینی یاپگن، امریکا اېسه ایرانگه قرشی دېنگیز قملینی ینه تیکلهگن.
