امریکا قۉشمه ایالتلری جمهور رییسی دونهلد ترامپنینگ آگاهلنتیریشیچه، بوندن بویان ایران هرمز بۉغازیده بیرار کېمهگه هجوم قیلسه، امریکا بونگه جوابن بیرته کۉپریک یاکه برق ترماغینی بامباردمان قیلیب ویران قیلهدی.
او بوگون (چهارشنبه، ۳۱-سرطان) تروثسوشیال ترماغیده یازیشیچه، امریکا نشانلری آرهسیده تهران ایچیدهگی یاکه اونینگ اطرافیدهگی کۉپریکلر و برق ترماقلری هم بۉلهدی.
ایران و امریکا اۉرتهسیدهگی حربي تۉقنهشوولر قَیته باشلنگنیدن بېری بو دونالد ترامپنینگ ایران آستقورمهلری و برق تاسیساتلریگه ضربه بېریش بیلن تهدید قیلهیاتگن ایکّینچی بیاناتی حسابلنهدی.
ایران حاضرچه ترامپنینگ سۉنگگی تهدیدیگه رسمي مناسبت بیلدیرمهگن. بیراق اوّلراق اسلام انقلابی قۉریقچیلری امریکا ایران آستقورمهلریگه هجوم قیلسه، منطقهدهگی آستقورمهلر و تاسیساتلرنی نشانگه آلیشی حقیده آگاهلنتیرگن اېدی.
شو بیلن بیرگه، سۉنگگی کونلرده ایران یېتکرمهلری امریکا تامانیدن مملکتدهگی اَیریم تېمیر یۉللر، کۉپریکلر و دېنگیز سووی چوچوکلشتیریش تاسیساتلریگه ضربهلر بېریلگنی حقیده خبر ترقهتگن.
اۉز نوبتیده، کویت هم ایران تامانیدن مملکتدهگی بیر نېچه برق تاسیساتلری و سوونی چوچوکلشتیریش انشااتلریگه هجوم قیلینگنینی معلوم قیلگن.
