محلي منبعلرنینگ اطلاعات روزگه معلوم قیلیشیچه، طالبلر پنجشیر ولایتینینگ پریان اولسواللیگیده اهالیگه نسبتاً «دشمنانه و آچیق عداوت» سیاستینی یوریتماقده.
شخصی آشکار اېتیلیشینی ایستهمهگن بیر منبع نینگ ایتیشیچه، طالبلر بو کونلرده اۉز خوفسیزلیک پوستهلریگه یېتیب باریش اوچون یۉل قورماقده. یۉل قوریلیشی دوامیده اولر اهالی اېکین میدانلری و مېوهلی درختلرینی ویران قیلماقده.
منبعنینگ سۉزلریگه کۉره، سۉنگّی کونلرده پریان اولسواللیگینینگ خاواک منطقهسیده طالبلر اوردوسینینگ مخصوص لواسی یۉل قورماقده و یۉل نینگ بیر قِسمینی دهقان نینگ اېکین میدانی اۉرتهسیدن اۉتکزگن.
اونینگ ایتیشیچه، یېر اېگهسی یۉلنی فایدهلنیلمهیاتگن قویی قِسمدن اۉتکزیشنی سۉرهگن، بیراق طالبلر اونینگ التماسینی رد اېتگن. یېر اېگهسی بۉلگن کېکسه کیشی یېری نینگ بوزیلیشینی تصویرگه آلماقچی بۉلگنیده، طالبلر اونی تیاق و میلتیق قۉنداغی بیلن قتّيق کلتکلب: «بېش ییل بۉلدی، سیزلر حلی هم مسلمان بۉلمهدینگیز»، دېگن.
منبع ینه قۉشیمچه قیلیشیچه، شو منطقهده طالبلر ینه بیر پوستهگه یۉل آچیش اوچون یۉلنی سوغاریش کانالی اۉرتهسیدن قوریب، محلي اهالیگه اېندی کانال قزیشگه حقلری یۉقلیگینی، عکس حالده یۉل بوزیلیشینی ایتگن. نتیجهده کانال سووی توختهگن و بو کانالدن سوغاریلهدیگن برچه اېکینلر همده درختلر قوریب کېتیش خوفی آستیده قالگن.
محلي اهالی وکیللرینینگ ایتیشیچه، طالبلر پریان اولسواللیگینینگ برچه قیشلاقلریده خودّی شو اصول بیلن، «عداوت سبب»، یۉللرنی آدملرنینگ یېر میدانلری اۉرتهسیدن اۉتکزگن، حتا اَیریم قیشلاقلرده تورر جایلرنی هم بوزگن.
ینه بیر منبع اطلاعات روزگه معلوم قیلیشیچه، پریان اولسواللیگینینگ کوجان حدودیده جایلشگن طالبان حربي بۉلینمهلری محلي اهالیگه: «آرهنگیزده بیرارته هم مسلماننی کۉرمهدیک»، دېگن.
منبعلرنینگ توشونتیریشیچه، طالبلر بیر نېچه قیشلاق اهالیسینی ییلاولردن مجبورن توشیریب یوبارگن و چاروا ماللرینی تاغلرگه آلیب چیقیشگه رخصت بېرمهگنیدن سۉنگ، اهالی پنجشیر حاکمی و طالبلرنینگ حربي کمیسیونیدن ییلاودن فایدهلنیش اوچون رخصت آلگن.
اما اوشبو حدودده جایلشگن طالبلر کندکی ولایت حاکمی و حربي کمیسیون بویروغینی تن آلمهگن همده: «سیزلر وعدهنگیزده تورمهیسیزلر. هر سفر مجبوريت آلسنگیز هم، بیزگه هجوم قیلینهدی. آرهنگیزده مسلماننی کۉرمهدیک»، دېگن.
پنجشیرنینگ پریان اولسواللیگی سۉنگگی آیلرده طالبلرگه قرشی قوراللی گروهلر هجوملری کوزهتیلهیاتگن حدودلردن بیری حسابلنهدی. اېنگ سۉنگگی حالتده، اۉتگن هفته سابق حکومت جمهور رئیس اۉرین باسری امرالله صالح باشچیلیگیدهگی روندسبز اۉز حربي کوچلری پریان اولسواللیگی حاکملیگی بناسیگه راکت هجومی اویوشتیرگنینی اعلان قیلگن.
