بیرلشگن ملتلر تشکیلاتی باش کاتبی آنتونیو گوترش دمشققه قیلگن تشریفی چاغیده سوريهنینگ مؤقت جمهور رییسی احمد الشرع بیلن اوچرهشیب، بیرلشگن ملتلر تشکیلاتی و سوريه اۉرتهسیدهگی همکارلیکنی مستحکملش مسألهلرینی بحث قیلدی.
بیرلشگن ملتلر تشکیلاتی باش کاتبی مطبوعات سۉزلاوچیسی ادارهسی بوگون (یکشنبه،۴ اسد) نشر قیلگن بیاناتده گوترش «سوريهدهگی سیاسي اۉتیش جریانیده اېریشیلگن یوتوقلرنی» آلقیشلهگنی قید اېتیلگن.
بیاناتگه کۉره، گوترش و الشرع سیاسي اۉتیش جریانینی قۉللب-قوّتلش، مملکتنی تیکلش و قَیته قوریش یۉلیده بیرلشگن ملتلر تشکیلاتی همده سوريه اۉرتهسیدهگی همکارلیکنی کوچهیتیریش یۉللری یوزهسیدن فکر المشگن.
بیرلشگن ملتلر تشکیلاتی باش کاتبی برچه سوريهلیکلر اوچون تینچ، برقرار و فراوان سوريه برپا اېتیش مقصدیده کېنگ قمراولی و سیاسي اشتراک ضرورلیگینی تأکیدلهدی.
شونینگدېک، گوترش اسرایل نینگ سوريه حدودیگه اویوشتیرهیاتگن هجوملریگه تۉختهلیب، بیرلشگن ملتلر تشکیلاتینینگ سوريه نینگ حاکمیتی، مستقللیگی، بیرلیگی و حدودي یخلیتلیگینی قۉللب-قوّتلشگه صادقلیگینی ینه بیر بار تصدیقلهدی همده اسرایل تامانیدن ۱۹۷۴ییلدهگی حربي ارهلشمسلیک تۉغریسیدهگی کېلیشوو بوزیلهیاتگنیدن خواطر بیلدیردی.
بیرلشگن ملتلر تشکیلاتی باش کاتبی تشکیلات سوريه خلقینی قۉللب-قوّتلشده دوام اېتیشینی و مملکت نینگ مهم اۉتیش دوریده سوريه حکومتی بیلن یقین همکارلیک قیلیشینی تأکیدلهدی.
انتونیو گوترش تیناوون باشچیلیگیدهگی هیئت بیلن دَمشققه یېتیب باردی. بو سوريهده۱۴ ییل دوام اېتگن اوروشدن کېین بیرلشگن ملتلر تشکیلاتی باش کاتبی نینگ ایلک تشریفی حسابلنهدی. بوندن اوّل، ۲۰۰۹-ییلده، یعنی۱۷ ییل آلدین، اۉشه پیتدهگی بیرلشگن ملتلر تشکیلاتی باش کاتبی بان کو مون سوريهگه تشریف بویورگن اېدی.
بشار اسد حکومتی اوروش و غرب چېکلاولریدن سۉنگ خلقارا میدانده یکّهلنیب قالگن اېدی. اۉتگن ییلی بشار اسد دَمشقدن چیقیب کېتگنیدن سۉنگ حاکمیتگه کېلگن احمد شرع سیلاولر اۉتکزیش، کېنگ قمراولی حکومت توزیش و سوريهنی خلقارا همجمعیتگه قَیته ادغام قیلیشگه وعده بېرگن.
