رویترز اخبارات آژانسی‌نینگ خبر بېریشیچه، امریکا جمهور رییسی دونالد ترامپ‌نینگ ایرانگه ینه هجوم قیلیش حقیده‌گی تهدیدی فارس کۉرفزی مملکتلرینی خواطرگه سالگن.
آژانس‌نینگ یازیشیچه، اولر واشنگتن‌ده قرار قیلینه‌دیگن، اما بو مملکتلرنی ایران نینگ جواب هجوملری نشانیگه ایلنتیریشی ممکن بۉلگن ینه بیر اوروشگه تارتیلیب کېتیشدن خواطرده.
رویترز نینگ یازیشیچه، اوّلگی اوروش دوریده ایران‌نینگ امریکانینگ حربي بازه‌لری و فارس کۉرفزی مملکتلریده‌گی انرژی تاسیساتلریگه بېرگن هجوملری واشنگتن نینگ منطقه‌ده‌گی بیر نېچه اۉن ییللیک خوفسیزلیک توزیلمه‌سی نینگ ضعیفلیگینی نمایان قیلگن. امریکانینگ موجودلیگی ایران هجوملرینی توخته‌تیش اۉرنیگه، اونینگ منطقه‌ده‌گی کېنگ کۉلملی حربي اشتراکی ایرانگه دایمي نشانلر تقدیم اېتگن و امریکا کوچلرینی قبول قیله‌یاتگن مملکتلرگه نسبتاً تهران نینگ باسیم واسطه‌سیگه ایلنگن.
رویترز معلوماتیگه کۉره، بو خواطرلر بحرین‌ده بۉلیب اۉتگن «مناما ملاقاتی» خوفسیزلیک کنفراسسیده وزیرلر، سیاستچیلر و خوفسیزلیک رسميلری اوچره‌شوولری‌نینگ اساسي موضوعسی بۉلگن. اونده حکومتلر نوبتده‌گی اوروش یوز بېرگن تقدیرده امریکا کوچلری و اولرنی قبول قیله‌یاتگن مملکتلر اوچون یوزه‌گه کېلیشی ممکن بۉلگن عاقبتلرنی محاکمه قیلگن.
اوروش یقینلشماقده
امریکا جمهور رییسی دونالد ترامپ مملکتده ایرته‌گه بۉلیب اۉته‌دیگن آره‌لیق سیلاولردن سۉنگ ایرانگه قرشی «غضب حماس» دېب اتله‌دیگن ینه بیر کیچیک اۉپراسیون‌نی باشلش بیلن تهدید قیلگن.
رویترزگه تۉرت نفر اروپالیک رسمي امریکا منطقه‌گه قیسقه مدت ایچیده، احتمال، حتا شو هفته نینگ اۉزیده‌یاق ایرانگه هجوم قیله آله‌دیگن درجه‌ده یېترلی حربي کوچ و تخنیک جایلشتیرگنینی ایتگن.
فارس کۉرفزی مملکتلری رهبرلری بیلن یقین علاقه‌ده بۉلگن بېشینچی اروپالیک رسمي هم: «اوروش یقینلشماقده. هېچ کیم بو اوروشنی ایسته‌مه‌یدی»، دېگن.
مصر تشقی ایشلر وزیری بدر عبدالعاطی هم منه‌مه کنفراسسیده نوبتده‌گی تۉقنه‌شوو اوّلگیسیدن انچه خوفلی و ویرانکار بۉلیشیدن آگاهلنتیرگن.
او: «بو اوروش هېچ قنده‌ی نتیجه‌گه آلیب کېلمه‌یدی»، دېگن.
احتمالي هجوم نشانلری
ایکّی نفر اروپالیک رسمي رویترزگه امریکا هجوملری احتمال ایران نینگ هستوي تاسیسات، جمله‌دن، تدقیقات و رواجلنتیریش مرکزلرینی نشانگه آلیشینی ایتگن.
آژانس خبریگه کۉره، احتمالي نشانلردن بیری اېران نینگ هستوي دستوری بیلن باغلیق دېب قره‌له‌یاتگن «کون کلنگ» هستوي تاسیساتی بۉلیشی ممکن.
بیراق اروپالیک رسميلر حربي حرکتلر ایران نینگ صلاحیتینی فقط ضعیفلشتیریشی، اونی بوتونله‌ی یۉق قیله آلمه‌سلیگینی ایتگن.
ایران رسميلری هم رویترزگه امریکا و اسرایل هجوملریگه جواب قَیتریش اوچون احتمالي نشانلر نینگ انیق رۉیخطینی توزگنینی بیلدیرگن.
اولر نینگ ایتیشیچه، بو نشانلر سووآستی علاقه کېبللری و حربي بازه‌لرنی، جمله‌دن، اَیریم یشیرین تاسیساتلرنی هم اۉز ایچیگه آله‌دی.
رویترزنینگ یازیشیچه، بونده‌ی استراتیژي اوروش خرجتلرینی جنگ میدانیدن تشقریگه هم یاییشی، فارس کۉرفزی مملکتلریده‌گی انرژی اینفره‌توزیلمسی، سوونی توزسیزلنتیریش انشااتلری، علاقه ترماقلری همده شهرلریده‌گی آچیق و معلوم نشانلرنی خوف آستیده قالدیریشی ممکن.
ایران حربي جهتدن امریکا و اسرایل بیلن رقابتلشه آلمه‌یدی. بیراق مانما کنفراسسی اشتراکچیلریدن اوچ نفری ایران اۉز مقصدلریگه اېریشیش اوچون بونده‌ی رقابتگه محتاج اېمسلیگینی ایتگن.
رویترز نینگ یازیشیچه، ایران استراتیژيسی اوروشنی حالدن تایدیرووچی ماجراگه ایلنتیریشگه اساسلنگن. تهران اۉزینی حمایه قیلیش آرقه‌لی منطقه‌ده‌گی امریکا کوچلری نینگ موجودلیگینی قیمتگه توشیریش، بو کوچلرنی قبول قیله‌یاتگن مملکتلرگه باسیم اۉتکزیش و اقش نینگ هر قنده‌ی چېکینیشینی واشینگتن نینگ اتفاقچیلرینی حمایه قیله آلمه‌سلیگی نینگ بېلگیسی صفتیده کۉرسه‌تیشنی مقصد قیلماقده.
خلق‌ارا استراتژیک تدقیقاتلر انستیتوتی نینگ منطقوي خوفسیزلیک بۉلیمی مدیری، مناما کنفراسسینی تشکیل اېتگن انستیتوت وکیلی امیل حکیم شونده‌ی دېگن: «ایرانلیکلر اوچون حقیقتاً هم مهم بۉلگن نرسه امریکا کوچلری نینگ منطقه‌دن چیقیب کېتیشیدیر.»
او رویترزگه: «تهران نینگ فارس کۉرفزی دولتلریگه اساسي خبری شوکی: سیز ۴۰ ییل دوامیده امریکاگه سرمایه کیریتدینگیز، اما ۴۰ ییلدن سۉنگ بو بازه‌لر سیزنی حمایه قیلیش او یاقده تورسین، عکسینچه، سیزنی خوف آستیده قالدیردی»، دېگن.
فارس کۉرفزی مملکتلری اوروش خرجتلرینی تۉله‌یدی
رویترز معلوماتیگه کۉره، بحرین‌ده ایران تهدیدیدن خواطر تاریخي و دیني قره‌مه-قرشیلیکلر بیلن چنبرچس باغلنگن.
۲۰۱۱-ییلده اساسن مملکتده‌گی شیعه جماعه‌سی تامانیدن اویوشتیریلگن کېنگ کۉلملی نمایشلر سنّی الخلیفه حکومتیگه قرشی جدّي چقیریق بۉلگن. بحرین حکمدارلری بو نمایشلرنی باستیرگن و ایرانگه ترتیبسیزلیکلرگه اره‌لشگنلیکده عیب قۉیگن. تهران اېسه بو عیبلاونی رد اېتگن.
بیراق امریکا و اسرایل نینگ ایرانگه قرشی اوروشی باشلنگنیدن بېری ایرانده‌گی اَیریم رادیکال گروهلر ینه بحریننی «ایران نینگ ۱۴-ولایتی» دېب اته‌ی باشله‌گن. بو حدودي دعوادن اېران ۱۹۷۰ییلده واز کېچگن اېدی.
رویترز یازیشیچه، اوشبو تاریخي حسابگه آلسک، بحره‌ینده‌گی امریکا تاسیساتلریگه قیلینگن هجوملر نه‌فقط امریکانینگ بحرینده‌گی حربي موجودلیگینی، بلکه بو کوچلرنی قبول قیله‌یاتگن بهره‌ین قیراللیگی نینگ اۉزینی هم خوف آستیده قالدیره‌دی.
فارس کۉرفزی مملکتلریدن بیری نینگ رسمي وکیلی رویترزگه: «بیز، اساسن، اېنگ یامان سناریوگه دوچ کېلماقده‌میز»، دېگن.
او امریکا تېز آره‌ده ایرانگه هجوم قیلیشینی و بو نینگ آرتیدن ایران بوتون فارس کۉرفزی منطقه‌سیده‌گی فقرالیک تاسیساتینی جواب هجوملری نشانیگه ایلنتیریشینی تخمین قیلگن.
کۉرفز مملکتلریدن ینه بیر رسمي: «آخر-عاقبت، فقط بیر کیشی قرار قبول قیله‌دی»، دېگن.
رویترزنینگ یازیشیچه، بو سۉزلر ترامپگه اشاره بۉلیب، فارس کۉرفزی مملکتلری نینگ عاقبتلرینی اۉزلری باشدن کېچیره‌دیگن اوروشگه تأثیر کۉرسه‌تیش امکانیتی قنچه‌لیک چېکلنگنینی کۉرسه‌ته‌دی.
آق اوی رسميسی رویترزنینگ بو باره‌ده‌گی سواللریگه جوابن: «برچه وریانتلر هنوز چوکی اوستیده توریبدی و ایران ایکّی تنلاوگه دوچ کېلماقده: آسان یۉل یاکه قیین یۉل»، دېگن.
او: «جمهور رییس ترامپ برچه کارت‌لرنی قۉلیده اوشلب توریبدی»، دېیه قۉشیمچه قیلگن.
خلق‌ارا استراتژیک تدقیقاتلر انستیتوتی منطقوي خوفسیزلیک بۉلیمی مدیری هم: «ایران نینگ استراتیژيسی امریکالیکلرنی حالدن تایدیریشدیر؛ اونینگ مقصدی غلبه قازانیش اېمس»، دېگن.
امیل حکیم قۉشیمچه قیلگن: «ایران سیزنی وقت اۉتیشی بیلن کۉپراق انرژی، قورال-یراغ و مبلغ صرفلشگه مجبور قیلیشی ممکن.»
ینه بیر اوروش نینگ آلدینی آلیش اوچون دیپلوماتیک سعی-حرکتلر
رویترز معلوماتیگه کۉره، بو خواطرلر فارس کۉرفزی مملکتلرینی تاباره کۉپراق دیپلوماتيه‌گه یوزلنیشگه اونده‌ماقده.
سعوديه عربستانی، تورکيه و پاکستان نینگ یوقاری مرتبه‌لی رسميلری اۉتگن آی تهرانده ایران رسميلری بیلن اوچره‌شگن. سعوديه عربستانی بو سعی-حرکتلردن مقصد «حربي ترنگلیک نینگ ینه کوچه‌ییشیگه یۉل قۉیمسلیک» اېکنینی بیلدیرگن.
قطر رسميلری هم اۉتگن هفته آخری و شو هفته نینگ باشیده اوروش نینگ قَیته باشلنیشیگه یۉل قۉیمسلیک مقصدیده تهران و دوحه‌ده اوچره‌شوولر اۉتکزگن.
بیرلشگن عرب امیرلیکلری نینگ یوقاری مرتبه‌لی رسميسی انور گرگش منامه کنفراسسیده: «دیپلوماتیک امکانیت آچیلیشیگه امید قیله‌میز. بیز حقیقتاً هم منطقه‌ده ینه بیر قره‌مه-قرشیلیککه گواه بۉلیشنی ایسته‌مه‌یمیز»، دېگن.
بیراق او بیرلشگن عرب امیرلیکلری «اېنگ یامان سناریو»گه تیارلنه‌یاتگنینی تأکیدله‌گن.
رویترزنینگ یازیشیچه، فارس کۉرفزی مملکتلری رهبرلریگه یقین بۉلگن اروپالیک رسمي واشینگتن و تهران اۉرته‌سیده‌گی کېلیشماوچیلیکلرنی دیپلوماتيک آرقه‌لی یومشه‌تیش امکانیتیگه نسبتاً چوقور پېسسیمیزم موجودلیگینی بیلدیرگن.
اونینگ ایتیشیچه، کۉپلب رسميلر نظریده اوروش نینگ قَیته باشلنیشی اېندی «اگر» مسأله‌سی اېمس، بلکه «قچان» مسأله‌سیدیر.
رویترزنینگ معلوماتیگه کۉره، حاضر اساسي سوال واشینگتن فارس کۉرفزی خوفسیزلیگیگه صادق قاله‌دیمی یاکه یۉقمی، دېگن مسأله اېمس. اساسي سوال امریکا نینگ خوفسیزلیک کفالتی اوشبو کفالتگه اساس بۉلگن تاسیساتلر نینگ اۉزی هجوم نشانیگه ایلنگن بیر پیتده نیمه‌نی انگله‌ته‌دی؟
آژانس‌نینگ قۉشیمچه قیلیشیچه، رقابت نینگ ماهیتی اۉزگره‌یاتگنگه اۉخشه‌یدی. اېندی گپ فقط کیم اېنگ کتّه حربي ضرر یېتکزه آلیشی حقیده اېمس، بلکه کیم اوروش خرجتلرینی اوزاقراق وقت دوامیده کۉتره آلیشی حقیده بارماقده. واشینگتن نینگ منطقه‌ده‌گی همکارلرینی اېسه نوبتده‌گی اوروش باشلنگن تقدیرده اونینگ اساسي خرجتلری اۉز ذمّه‌لریگه توشیشیدن خواطرده.
