اۉزبېکستان باش وزیری اۉرینباسری جمشید خواجهیف اۉزبېکستان حیرتان بندریده (زینک) تاشینی قَیته ایشلش فابریکهنی برپا اېتیشگه۵۰ میلیون امریکا دالری مقداریده سرمایه کیریتیشگه تیارلیگینی معلوم قیلدی.
اوشبو حقده او بوگون (یکشنبه، ۴-اسد) طالبان باش وزیری اقتصادي مسألهلر بۉییچه اۉرینباسری عبدالغنی برادر بیلن اوچرهشووده معلوم قیلگن.
اونینگ ایتیشیچه، اۉزبېکستان افغانستاننینگ تورلی کانلریگه هم سرمایه کیریتیشگه، شونینگدېک، افغانستاندن گۉشت و پخته وارد قیلیشنی آشیریشگه تیار.
جمشید خواجهیف اۉزبېکستان افغانستانده اۉزبېک سرمایهدارلری باشلهگن لایحهلرنی عملگه آشیریش جریانینی جدللشتیریش و اولر دوچ کېلهیاتگن معمالرنی برطرف اېتیشگه هم تیار اېکنینی بیلدیرگن.
عبدالغنی برادر اېسه ایکّی تامان اۉرتهسیدهگی قۉشمه رېجه نینگ ثمرهلی عملگه آشیریلیشینی سۉرب، اونی ایکّی دولت اقتصادي ترقیاتی اوچون مهم دېب بهالهگن.
شونینگدېک، او افغانستان صادرات یوکلرینی اۉزبېکستانگه آلیب اۉتووچی ترانسپورت واسطهلری حرکتی آلدیدهگی تۉسیقلرنی برطرف اېتیش، چین، مرکزي آسیا و روسيهدن ترانزیت آرقهلی کیریب کېلهیاتگن افغانستان یوکلریگه باجخانه امتیازلری بېریش، افغانستان نینگ قیشلاق خۉجهلیگی محصولاتلری، ینگی و قوریتیلگن مېوهلری، آزیق-طعام همده قیمتبها منرال محصولاتلرینی مرکزي آسیا، روسيه و چین بازارلریگه صادر قیلیش اوچون اۉزبېکستان تامانیدن قولهیلیکلر یرهتیشنی سۉرهگن.
برادر، شونینگدېک، ترانزیت آستقورمه امکانیتینی آشیریش، باجخانه تیزیمینی رواجلنتیریش، افغانستان فقرالری اوچون ویزه بېریش جریانینی یېنگیللشتیریش همده انرژی و قۉشمه آستقورمه لایحهلری بۉییچه همکارلیکنی کېنگهیتیریشنی هم تکلیف قیلگن.
طالبلر باش وزیری اقتصادي مسألهلر بۉییچه اۉرینباسری نینگ تاکیدلشیچه، گروه افغانستان و اۉزبېکستان اۉرتهسیدهگی کېنگ قمراولی همکارلیک نهفقط ایکّی تامانلهمه اقتصادي علاقهلرنی ینگی باسقیچگه آلیب چیقیشیگه، بلکه قۉشنی دولتلر اوچون هم یخشی قۉشنیچیلیک نمونهسی بۉلیشیگه ایشانهدی.
جمشید خواجهیف تیناوون اۉزبېکستان حکومت و خصوصي سکتور وکیللریدن عبارت هیئت باشچیلیگیده کابلگه تشریف بویورگن اېدی.
او تشریف دوامیده طالبلر باش وزیری همده باشقه قطار یوقاری مرتبهلی عملدارلر بیلن اوچرهشیب، ایکّی تامانلهمه همکارلیکنی رواجلنتیریش و مستحکملش مسألهلرینی بحث قیلگن.
