افغانستاننینگ بیرلشگن ملتلر تشکیلاتیدهگی تۉقّیزینچی دایمي نمایندهسی عبدالغفور روان فرهادی۹۶ یاشیده وفات اېتدی.
افغانستاننینگ بیرلشگن ملتلر تشکیلاتیدهگی نمایندهلیگی سرپرستی نصیر احمد فایق بوگون (دوشنبه،۵-اسد) روان فرهادینینگ وفاتی مناسبتی بیلن مملکت دیپلوماتیک جمعیتیگه همدردلیک بیلدیردی.
عبدالغفور روان فرهادینینگ اۉغلی صارق فرهادی آتهسی امریکاقۉشمه ایالتلرینینگ سانفرانسیسکو شهریده کېکسهلیک طفیلی وفات اېتگنینی تصدیقلهدی.
عبدالغفور روان فرهادي ۱۹۹۳-ییلده مجاهدلر دولتی جمهور رییسی برهانالدین رباني تامانیدن نیویارکدهگی بیرلشگن ملتلر تشکیلاتی قرارگاهیده افغانستاننینگ دایمي وکیلی اېتیب تعیینلنگن اېدی.
مجاهدلر حکومتی قولهگچ و طالبان حاکمیتنی اېگهلهگچ، او مذکور و نمایندهلیکده سرپرستلیک قیلیشده دوام اېتدی.
جمهوریت توزومی تشکیل اېتیلگندن کېین هم او اۉز فعالیتینی دوام اېتتیردی و ۲۰۰۶-ییلگچه افغانستان نینگ بیرلشگن ملتلر تشکیلاتیدهگی دایمي وکیلی بۉلیب ایشلهدی.
روان فرهادي افغانستان تاریخیده بیرلشگن ملتلر تشکیلاتیدهگی اېنگ اوزاق مدت خدمت قیلگن دیپلوماتلردن بیری بۉلیب، مملکت نینگ اېنگ مرکّب دورلریده – مجاهدلر حکومتی، طالبلرنینگ بیرینچی حکمرانلیگی و جمهوریت دوریده جمعی۱۳ ییل دوامیده افغانستان نمایندهلیگیده سرپرستلیک قیلگن.
عبدالغفور روان فرهادي ۱۹۲۹-ییلده کابل شهریده توغیلگن. باشلنغیچ و اۉرته تعلیمنی کابلده آلگن،۱۹۵۲-ییلده اېسه پاریسدهگی سیاسي تدقیقاتلر انستیتوتی نینگ خلقارا مناسبتلر یۉنهلیشینی تماملهگن.
سیاستشناشلیک بیلن بیر قطارده او سوربن بیلیم یورتی ادبیات فاکولتهسیده سانسکریت و اوستا و عمومي تیلشناسلیکنی اۉرگنگن همده ۱۹۵۵-ییلده خوجه عبدالله انصارينینگ اثرلری، تفکری و تصوفی حقیدهگی علمي ایشی اساسیده دوکتورلیک درجهسینی آلگن.
عبدالغفور روان فرهادي فارسی، پشتو، فرانسوی، انگلیسی و عرب تیللرینی مکمل بیلگن.
