آلمان جنایت صادر اېتگن باشپناه ایزلاوچیلرنی مملکتدن چیقریش جریانی دایرهسیده۳۱ نفر افغانستان فقراسینی کابلگه قَیتردی.
دویچهوله یېتکرمهسی آلماننینگ «دیپیای» خبرگزارلیگیگه تهیهنیب خبر بېریشیچه، اوشبو شخصلرنی آلیب کېتهیاتگن اوچاق کېچه تونده (دوشنبه، ۵-اسد) لایپزیگ-هاله قۉنالغهسیدن کابل تامان پرواز قیلگن.
آلمان فدرال ایچکی ایشلر وزیری الکساندر دوبرینت بو دېپورتنی تصدیقلب، افغانستان نینگ ۳۱ وطنداشی آلماندن چیقریلگنینی ایتگن. اونینگ تأکیدلشیچه، اولرنینگ اکثریتی جنایت صادر اېتگن.
وزیرنینگ ایتیشیچه، بو شخصلرنینگ کۉپچیلیگی «قاتللیک، زۉرلش و زۉروانلیک بیلن باغلیق جنایتلر» کبی آغیر جنایتلرنی صادر اېتگن. اولر آرهسیده فقط بیر کیشی جنایت قیلمهگن، بیراق او هم آلماننی ترک اېتیشی کېرهک بۉلگن.
دوبرینتنینگ بیلدیریشیچه، سۉنگّی هفتهلرده فدرال یېرلر (حدودلر)گه بوندن کېین باشپناه سۉراوی رد اېتیلگن شخصلر هم دېپورت قیلینیشی ممکنلیگی حقیده معلومات بېریلگن.
آلمان حکومتی حاضرده طالبان مأموریتی بیلن توزیلگن کېلیشوو اساسیده اوشبو دېپورتلرنی عملگه آشیرماقده.
مذکور کېلیشوو افغانستانلیک جنایتچیلرنی اوچینچی دولت واسطهچیلیگیسیز مملکتگه قَیتریش امکانینی بېرگن. اوّل آلمان جنایت صادر اېتگن افغانستانلیکلرنی افغانستانگه قَیتریشده اوچینچی دولتلر بیلن همکارلیک قیلگن.
اوشبو دېپورتلر انسان حقوقلری تشکیلاتلری تامانیدن تنقید قیلینماقده. حقوق تشکیلاتلری افغانستاندهگی حاضرگی وضعیت باشپناه ایزلاوچیلرنی قَیتریش اوچون ماس اېمسلیگینی تأکیدلهماقده.
