چېگرهسیز شفاکارلر تشکیلاتی پاکستان پولیسی اوییگه باستیریب کیرگنیدن کېین افغانستانلیک مهاجر عیال حاملهسینی یۉقاتگنینی معلوم قیلدی.
تشکیلات بوگون، چهارشنبه (۵ اسد) نشر قیلگن بیاناتیده پاکستان حکومتینی افغانستان مهاجرلرینی مجبوري دېپورت قیلیشنی تۉختهتیشگه و اولرنینگ طبي خدمتلردن خوفسیز فایدهلنیشینی تأمینلشگه چقیردی.
چېگرهسیز شفاکارلر افغانستان مهاجر عایلهسینینگ حکایهسینی اعلان قیلدی. اونده عایله باشلیغی نجیبنینگ ایتیشیچه، پاکستان پولیسی اوییگه باستیریب کیریب اونی حبسگه آلگنیدن کېین خاتینی بچه تشلهگن.
نجیب نینگ سۉزلریگه کۉره، «پیاوآر»کارتیگه اېگه بۉلیشیگه قرهمهی، پولیس اونینگ اوییگه کیریب، اونی حبسگه آلگن.
او شوندهی دېدی: «خاتینیم اوچ آیلیک حاملهدار اېدی. پولیس مېنی حبسگه آلگنیدن سۉنگ، قۉرقوو و کوچلی روحي باسیم سبب اونده آغیر قان کېتیش باشلندی.»
نجیب نینگ ایتیشیچه، آزادلیککه چیققچ و اېرتهسی کونی اویگه قَیتگچ، خاتینی حلی هم دهشت ایچیده بۉلگن و اونگه کوچلی قان کېتگنی حقیده ایتگن.
او ینه شوندهی دېدی: «خَیالیم حبسگه آلینهیاتگنیم، روحي ضربه و کېچهگی واقعهلر تصویرلری بیلن تۉله اېدی. اما خاتینیم نینگ حیاتینی سقلب قالیش اوچون قۉرقوویمگه قرهمهی حرکت قیلدیم.»
نجیبنینگ سۉزلریگه کۉره، اولر آخر-عاقبت شفاخانهگه باریشگه قرار قیلگن، بیراق او ینه حبسگه آلینیشی ممکنلیگیدن قۉرققن. خاتینینی شاشیلینچ روشده شفاکارگه آلیب بارگن، اما کېچ بۉلگن و او حاملهسیدن اَیریلگن.
چېگرهسیز شفاکارلر تشکیلاتی پاکستاندهگی افغانستا مهاجرلری دایما حبسگه آلینیشی، تیریکچیلیک منبعلریدن اَیریلیشی و دېپورت قیلینیشیدن قۉرقیب یشه یاتگنینی بیلدیردی.
تشکیلات نینگ تأکیدلشیچه، مجبوري دېپورت مهاجرلرنینگ طبي خدمتلردن فایدهلنیشینی قیینلشتیرگن. کۉپلب عایلهلر حبسگه آلینیشی خوفی سبب طبي یاردمنی کېچیکتیرماقده یاکه اوندن بوتونلهی واز کېچماقده.
تشکیلات پاکستان حکومتینی افغانستان مهاجرلرینی مجبوري دېپورت قیلیش دستورینی تۉختهتیشگه چقیریب، شفاخانهلرگه بارهیاتگن یاکه قَیتهیاتگن بېمارلر و طبي یاردمگه محتاج شخصلر حبسگه آلینمسلیگی و دېپورت قیلینمسلیگی کېرهکلیگینی تأکیدلهدی.
شونینگدېک، تشکیلات نینگ قید اېتیشیچه، دېپورت سیاستی کۉپلب مهاجرلرنینگ ایش و درآمد منبعلرینی یۉقاتیشیگه سبب بۉلگن، بو اېسه اولرنینگ فرزندلری آرهسیده تۉییب طعاملنمسلیک حالتلرینی کوچهیتیرگن.
بلوجستان نینگ کوېته شهریده آچیلگن ساغلیقنی سقلش کلینیکی معلوماتلریگه کۉره، افغانستان مهاجر عیاللر و بالهلر نینگ ۷.۶ فایزی آغیر اۉتکیر تۉییب طعاملنمسلیک، ۲۵.۷ فایزی اېسه اۉرتهچه درجهدهگی اۉتکیر تۉییب طعاملنمسلیکدن اذیت چېکماقده.
پاکستان ۲۰۲۳-ییلدن بویان افغانستان مهاجرلرینی کېنگ کۉلمده دېپورت قیلیشنی باشلهگن. حاضرگچه ۲.۷ میلیوندن آرتیق کیشی افغانستانگه قَیتریلگن و بو جریان همان دوام اېتماقده.
سۉنگی باسقیچده پاکستان حکومتی یشش حجتینینگ عمل قیلیش مدتی توگهگن شخصلرنی مجبوري دېپورت قیلیشنی باشلهگن بۉلیب، بو چارهدن تخمیناً ۷۰ مینگ افغانستان مهاجری تأثیرلنیشی کوتیلماقده.
