رویترز اخبارات آژانسی خبردار منبعلرگه تهیهنیب گزارش بېریشیچه، ایران چیندن یېلکهده آلیب یوریلهدیگن هوا مدافعه تیزیملرینی ساتیب آلگن.
رویترز بوگون، چهارشنبه (۷اسد) نشر قیلگن گزارشیده یازیشیچه، ایران یقین بیر نېچه هفته ایچیده چینده ایشلب چیقریلگن کۉپی بیلن۴۰۰ ته یېلکهده آلیب یوریلهدیگن راکت تیزیمینی قبول قیلیب آلهدی.
نشر بیلن صحبتلشگن اوچ نفر خبردار منبع نینگ ایتیشیچه، اوشبو شرطنامه قیمتی ۷۰-۶۰ میلیون امریکا دالرینی تشکیل اېتهدی.
بیتیم دایرهسیده ایران قیسقه مصافهلی هوا مدافعهسینی کوچهیتیریش مقصدیده ۴۰۰-۳۰۰ دانه کۉچمه راکت تیزیمینی آلهدی.
اروپالیک خوفسیزلیک منبعلریدن بیری رویترزگه اونینگ مملکتی رسميلری اېرانگه «کیودبلیو» یېلکهده آلیب یوریلهدیگن راکت تیزیملرینی ساتیش بۉییچه بیر نېچته احتمالي شرطنامهلردن خبردار اېکنینی بیلدیرگن.
حساباتگه کۉره، شرطنامه هنگکنگ جایلشگن «ژونگکینگ بائوشانگ» انترنشنل شرکتی بیلن امضالنگن. منبعلرگه کۉره، اوشبو کمپنی ایران تامانی و چینلیک یېتکزیب بېرووچی اۉرتهسیده واسطهچی وظیفهسینی بجرماقده.
خبردار منبعلرنینگ ایتیشیچه، یوک چین نینگ غربیدهگی اورومچیدن پاکستانگه، او یېردن اېسه ایرانگه یېتکزیلیشی رېجهلشتیریلگن.
ایران تشقی ایشلر وزیرلیگی بو بارهدهگی سۉراوگه جواب بېرمهگن. چین تشقی ایشلر وزیرلیگی اېسه مذکور خبرلرنی «مطلقا اساسسیز» دېب اتهگن.
پاکستان اوردوسی جماعتچیلیک بیلن علاقهلر بۉلیمی هم اسلام آباد نینگ بو مسألهگه علاقهدارلیگینی رد اېتیب، پاکستان چیندن ایرانگه هوا مدافعه قوراللرینی یېتکزیشده اشتراک اېتهیاتگنی حقیدهگی دعوالرنی «بوتونلهی اویدیرمه و یالغان» دېب بهالهگن.
