ایران تشقی ایشلر وزیرلیگی بیر بیانات نشر قیلیب، امریکا و سعوديه عربستانینینگ عراق نینگ اَیریم حدودلریگه، جملهدن عراق نینگ رسمي مؤسسهلری همده اربعین زیارتچیلریگه خدمت کۉرسهتووچی مسکنلرگه اویوشتیرگن هجوملرینی کېسکین قارهلهدی.
وزیرلیک بوگون، چهارشنبه (۷اسد) اعلان قیلگن بیاناتیده اوشبو هجوملرنی «عراق نینگ ملي حاکمیتی یېر بوتونلیگیگه آچیق تجاوز، شونینگدېک، بیرلشگن ملتلر تشکیلاتی نظامی نینگ ۲-مادّهسی ۴-بندی همده خلقارا حقوق نینگ اساسي تمایللرینی قۉپال روشده بوزیش» دېب بهالهدی.
بیاناتده ینه اوشبو هجوملر «امریکا و صهیونسیت رژیم نینگ غربي آسیاده اوروش و ماجرالر کۉلمینی کېنگهیتیریشگه قرهتیلگن مقصدلری یۉلیده عملگه آشیریلگن» اېکنی تأکیدلنگن.
ایران تشقی ایشلر وزیرلیگی ایراننینگ عراق حکومتی و خلقی بیلن تۉلیق بیردملیگینی بیلدیرر اېکن، «اوروش قۉزغهتووچی امریکا رژیمی و اونینگ منطقهدهگی اتفاقچیلرینی اوشبو جنایي، غیرِ انساني حرکتلرنینگ خوفلی عاقبتلری اوچون مسوول» دېب حسابلشینی معلوم قیلدی.
امریکا و سعوديه عربستانی کېچه تونده قۉشمه عملیاتلر دوامیده عراقده ایران قۉللب-قوّتلهیدیگن قوراللی گروهلر موضعلریگه ضربه بېرگن اېدی.
امریکا مرکزي قوماندانلیگی سنتکام مذکور هجوملر ایران اسلام انقلابی قۉریقچیلری کۉمهگیدهگی قوراللی گروهلرنینگ سعوديه عربستانیدهگی نفت انشااتلری و امریکا حربي پایگاهلریگه اویوشتیرگن درون هجوملریگه جوابن عملگه آشیریلگنینی بیلدیرگن.
عراقدهگی ایران طرفداری قوراللی گروهلر ائتلافی – حشد شعبی معلوم قیلیشیچه، هجوملرده ۲۰ نفر جنگچی هلاک بۉلگن، ینه 32 نفری یرهلنگن.
حشد شعبی بغداد، کربلا، واسط، نینوا، بصره، کرکوک و دیاله ولایتلریدهگی حربي تاسیساتلری نشانگه آلینگنینی، انساني تلفاتلردن تشقری، مادّي ضرر هم یېتگنینی تصدیقلهگن.
