آلمان باشقرهلاوچیلری مونیخ شهریده موتر بیلن آدملر ییغینیگه هجوم قیلگنلیکده عیبلنهیاتگن افغانستانلیک شخصگه نسبتاً عمرباد قماق جزاسی تعیینلنیشینی سۉرهدی.
دویچهوله خبریگه کۉره، آلمان فدرال باشقرهلاوچیسی وکیلی سهشنبه کونی (۶ اسد) مونیخ عالي منطقوي محکمهسیده: «بو هجوم آدملرنینگ حیاتیگه قصد قیلیش مقصدیده صادر اېتیلگنینی آچیق ایتیش کېرهک»، – دېگن.
تخمیناً ایکّی ساعت دوام اېتگن محکمه مجلسیده قرهلاوچی: «عیبلنووچی موترنی جمعیت اوستیگه اتهیلب هَیدهگنیگه هېچ قندهی شبهه یۉق»، – دېیه تأکیدلهگن.
هجوم اۉتگن ییل فبروری آییده آلمان نینگ مونیخ شهریدهگی بیر ییغیلیش وقتیده صادر بۉلگن. عاقبتده بیر آنه و اونینگ کیچیک قیزی هلاک بۉلگن، ینه بیر نېچه کیشی جراحت آلگن.
عیبلنووچی ۲۵یاشلی افغانستانلیک باشپناه ایزلاوچی بۉلیب، اونگه ایکّی کیشینی قصداً اۉلدیریش،۲۲ حالتده قاتللیککه سوءِقصد قیلیش و۲۲ حالتده آغیر تن جراحتی یېتکزیش عیبلاولری قۉییلگن.
دویچهوله معلوماتیگه کۉره، قرهلاوچی هجومنی «سیاسي و دیني ماتیولرگه اساسلنگن حرکت» دېب حسابلهماقده.
دادستانلرنینگ تأکیدلشیچه، عیبلنووچی بو هجومنی «خدا نینگ ارادهسیگه موافق ایش» همده امریکا و باشقه غرب دولتلری نینگ غزه و افغانستاندهگی حرکتلریگه «اۉرینلی جواب» دېب بیلگن.
شونینگدېک، دادستان هجومده عیبلنووچی نینگ شخصي روحي حالتی هم مهم رۉل اۉینهگنینی بیلدیرگن.
محکمه حکمی ۶-اگوست کونی اعلان قیلینیشی کوتیلماقده.
مونیخ دهگی اوشبو و افغانستانلیکلر اشتراک اېتگن باشقه هجوملردن سۉنگ آلمان حکومتی افغانستاندن کېلهیاتگن مهاجرلرگه نسبتاً سیاستینی قطعيلشتیردی همده جنایت صادر اېتگن باشپناه ایزلاوچیلرنی طالبان نظارتیدهگی افغانستانگه دېپورت قیلیشنی قَیته باشلهدی.
