«فارس کۉرفزی سوو یۉللرینی باشقریش تشکیلاتی» امریکانینگ «تجاوزکار حرکتلری» سببلی هرمز بۉغازی آرقهلی حرکتلنیش امکانسیز اېکنینی معلوم قیلدی.
مذکور تشکیلات بوگون (جمعه، ۹ اسد) نشر قیلگن بیاناتیده هرمز بۉغازی برقرارلیک و آسایشتهلیک تیکلنگنیدن سۉنگ قَیته آچیلیشینی بیلدیردی.
بیاناتده شوندهی دېییلهدی: «امریکا حربي کوچلرینینگ منطقهدهگی تجاوزکار حرکتلری دوام اېتهیاتگنی سببلی هرمز بۉغازی آرقهلی حرکتلنیش حاضرچه ممکن اېمس.»
تشکیلات نینگ قۉشیمچه قیلیشیچه، «برقرارلیک و آسایشتهلیک تیکلنیشی بیلن برچه عریضهلر نوبت و بېلگیلنگن جدول اساسیده کۉریب چیقیلهدی همده رخصتنامهلر باسقیچمه-باسقیچ بېریلهدی.»
ایران حکومتی «فارس کۉرفزی سوو یۉللرینی باشقریش تشکیلاتی»نی هرمز بۉغازی آرقهلی کېمهلر قتناوینی نظارت قیلیش و موافقلشتیریش اوچون تشکیل اېتگن.
ایران قوراللی کوچلرینینگ معلوم قیلیشیچه، هرمز بۉغازیدن اۉتیشدن آلدین اوشبو تشکیلات بیلن کېلیشیلگن کېمهلرگه هجوم قیلینمهیدی. بیراق تشکیلات بیلن کېلیشمسدن یاکه عمان قیرغاقلریگه یقین یۉنهلیشلردن حرکتلنگن کېمهلر «قاعدهبوزر» دېب بهالنیب، هجوم نشانیگه ایلنیشی ممکن.
امریکا بیر نېچه هفته اوّل «فارس کۉرفزی سوو یۉللرینی باشقریش تشکیلاتی»گه نسبتاً چېکلاولر جاري قیلگن.
امریکا مرکزي قوماندانلیگی سنتکام اېسه ایراننینگ «هرمز بۉغازینی بېقرارلشتیریشگه خدمت قیلهدیگن کوزهتوو و حربي امکانیتلری یۉق قیلینگنینی» همده حاضرده ایراننینگ «هرمز بۉغازی اوستیدن هېچ قندهی نظارتی یۉقلیگینی» دعوا قیلگن.
