الجزایرده یۉلاوچی اتوبوسی نینگ جرلیککه قولهشی عاقبتیده کمیده 27 کیشی هلاک بۉلدی، ینه 39 کیشی جراحت آلدی. مملکت حکومتی اوشبو فاجعه مناسبتی بیلن اوچ کونلیک ملي ماتم اعلان قیلدی.
الجزیره خبریگه کۉره، حادثه کېچه اېرتهلب (جمعه، 9-اسد) پایتخت یقینیدهگی الکرمه حدودیده صادر بۉلگن.
اتوبوس یۉلاوچیلرنی الجزایر شهریگه آلیب کېتهیاتگن پیتده یۉلدن چیقیب کېتیب، جرلیککه قولهگن.
الجزایر ساغلیقنی سقلش وزیری محمدصدیق آیت نینگ معلوم قیلیشیچه، اتوبوسدهگی 27 یۉلاوچی هلاک بۉلگن، ینه 39 کیشی جراحت آلگن.
او قربانلر سانی ینه آرتیشی ممکنلیگینی هم بیلدیرگن.
الجزایر جمهور رییسی عبدالمجید تبون اوچ کونلیک ملي ماتم اعلان قیلیب، برچه دولت ادارهلریده مملکت بیراغینی یریم اوستونگه توشیریشنی بویورگن.
جمهور رلیک ریاستی سرایی ترقهتگن بیاناتده تبون حادثهنی کېسکین قارهلب، عیبدارلرنی «یۉل جنایتچیلری و ترورچیلر» دېب اتهگن.
اونینگ تأکیدلشیچه، تېرگاو یکونلنگچ، محکمه اۉرگانلری عیبدارلرگه نسبتاً «تېمیر مشت بیلن و هېچ قندهی مُراضاتسیز» چاره کۉرهدی.
الجزایر فقرالیک محافظهسی خدمتی اتوبوس نامعلوم سببلرگه کۉره یۉلدن چیقیب کېتگنینی معلوم قیلگن.
الجزایرده اتوبوسلر اشتراکیدهگی هلاکتلی یۉل-ترانسپورت حادثهلری تېز-تېز صادر بۉلیب تورهدی. بیر ییل اوّل هم پایتخت یقینیده اتوبوس جرلیککه قولهشی عاقبتیده 18 کیشی هلاک بۉلگن، 21 کیشی جراحتلنگن اېدی. اۉتگن ییل دسامبر آییده اېسه مملکت جَنوبیدهگی بشار حدودیده اتوبوس اغدریلیب، 14 کیشی نینگ حیاتیگه ضامن بۉلگن.
الجزیره جزایر دولت ادارهلریگه تهیهنیب خبر بېریشیچه، اۉتگن ییلی مملکتده یۉل-ترانسپورت حادثهلری عاقبتیده 3 838 کیشی هلاک بۉلگن، 37 مینگدن آرتیق کیشی جراحت آلگن.
