طالبلرنینگ قاچقینلر ایشلری بۉییچه وزیرلیگینینگ معلوم قیلیشیچه، تخمیناً ایکّی آی آلدین ایتالياده جنایي حادثه عاقبتیده موتر ایچیده یاقیب یوباریلگن اوچ نفر افغانستانلیک نینگ جسدی کابلگه آلیب کېلینگن.
وزیرلیک بوگون (شنبه، ۱۰-اسد) بېرگن معلوماتگه کۉره، اۉلدیریلگنلرنینگ جسدلری جاري قویاش ییلنینگ۵ و۶کونلری کابلگه یېتکزیلگن. کېینچهلیک اولر تېز یاردم موترلریده بلخ ولایتینینگ شولگره تومنی، کابل شهرینینگ ۱۲ -ناحیهسی همده پروان ولایتی نینگ کوه صافی تومنیگه یوباریلگن.
جاري ییل نینگ ۱۲-جوزا کونی ایتاليانینگ کالابریا منطقهسیده اوچ نفر افغانستان و بیر نفر پاکستان وطنداشی موتر ایچیده اۉلدیریلگن اېدی. ایتالیا پولیسی اوشبو موترنی یاقیب یوباریش و تۉرت کیشینی اۉلدیریشده گمانلنیب، ینه ایکّی نفر پاکستان فقراسینی حبسگه آلگن.
طالبلر وزیرلیگی بیاناتیگه کۉره، قربانلر عصمتالله، فضل امین و امجد صافي بۉلیب، اولر ماس روشده بلخ، ننگرهار و پروان ولایتلریدن بۉلگن.
حادثهدن سۉنگ طالبلرنینگ تشقی ایشلر وزیرلیگی اونی قارهلب، واقعهنی شفّاف و عدالتلی طرزده تېرگاو قیلیشنی طلب قیلگن اېدی.
ایتاليا باش وزیری جورجیا ملونی هم قربانلر عایلهلریگه همدردلیک بیلدیریب، اوشبو جنایت یوزهسیدن عدالت قرار تاپیشیگه وعده بېرگن.
