پاکستان باش وزیرینینگ اۉرینباسری و تشقی ایشلر وزیری محمد اسحاق دار ایران تشقی ایشلر وزیری عباس عراقچی بیلن تیلفون آرقهلی ملاقات قیلدی.
پاکستان تشقی ایشلر وزیرلیگی بوگون، شنبه، ۲۸ سنبله نشر قیلگن بیاناتیده، تیلفون صحبتی چاغیده تامانلر منطقهدهگی سۉنگگی واقعهلر یوزهسیدن فکر المشگنینی معلوم قیلدی.
وزیرلیکنینگ قۉشیمچه قیلیشیچه، اسحاقدار، اینیقسه، رواجلنهیاتگن مملکتلر و گلوبل تأمینات زنجیرلری اوچون یوزهگه کېلهدیگن عاقبتلرنی حسابگه آلگن حالده، انرژی یېتکزیب بېریش نینگ اوزلوکسیز دوام اېتیشی همده کېمهلرنینگ خوفسیز و تېزکار حرکتلنیشینی تأمینلش مهملیگینی تأکیدلهگن.
پاکستان تشقی ایشلر وزیری، شونینگدېک، ایران و امریکا اۉرتهسیدهگی اوروشگه توختهلیب، ملاقات و دیپلوماتيک منطقهده تینچلیک و برقرارلیکنی تأمینلشنینگ یگانه عملي یۉلی بۉلیب قالهیاتگنینی ایتگن.
ایران تشقی ایشلر وزیرلیگی هم اوشبو تیلفون صحبتینی تصدیقلب، «تامانلر ایکّی مملکتنی قیزیقتیرهیاتگن مسألهلر همده منطقهدهگی سۉنگگی واقعهلر یوزهسیدن مصلحتلشیب، فکر المشگن»، دېب معلوم قیلگن. بیراق بو بارهده قۉشیمچه تفصیلاتلر کېلتیریلمهگن.
پاکستان ایران و امریکا اۉرتهسیده رسمي واسطهچی حسابلنهدی و ایکّی دولت اۉرتهسیدهگی اوروشنی توگهتیشگه حرکت قیلماقده. اوشبو سعی-حرکتلر نتیجهسیده ایکّی دولت «اسلام آباد کیلیشوو» دېب اتهلگن کېلیشوونی امضالهگن اېدی. بیراق آرهدن قریب ایکّی هفته اۉتیب، تامانلر بیر-بیرینی اوشبو کېلیشوونی بوزگنلیکده عیبلب، اوروشنی قَیته باشلهدی.
اوروش قَیته باشلنگنیدن سۉنگ، ایران ینه هرمز بۉغازینی یاپدی و اوشبو خلقارا سوو یۉلیدن اۉتهیاتگن بیر نېچه کېمهگه هجوم قیلدی. امریکا اېسه ایرانگه قرشی دېنگیز قملینی قَیته تیکلهدی.
هرمز بۉغازی نینگ یاپیلیشی و یمن حدودیدهگی اوروشنینگ بیر وقتده دوام اېتیشی جهان بازاریده نفت نرخینینگ آشیشیگه همده گلوبل یاقیلغی تأمیناتینینگ کمهییشیگه سبب بۉلگن.
