گوگل شرکتی اۉزینینگ «جمینای» یسمه آنگ خوفسیزلیک امکانیتلرینی بهالشگه قرهتیلگن ایلک سیناوده انترنتگه کیریش امکانیگه اېگه بۉلیب، باشقه اوچته کمپنینینگ تیزیملرینی بوزگنینی معلوم قیلدی.
«والاستریت ژورنال» خبریگه کۉره، حالتلردن بیریده جمینای پرول (رمز)لرنی تخمین قیله باشلهگن و آخر-عاقبت حمایهلنگن تیزیمگه کیریشگه موفق بۉلگن. قالگن ایکّی حالتده اېسه کیریش معلوماتلرینی عامهوي رپازیتاريدن تاپیب، اولردن فایدهلنیش آرقهلی حمایهلنگن تیزیملرگه کیرگن.
گوگلنینگ معلوم قیلیشیچه، یسمه آنگ مۉدلی اوچهله حالتده هم حقیقي کمپنی تیزیملریگه کیرگنینی انیقلهگچ، بوزیب کیریش جریانینی توختهتگن.
گوگل جمعه کونی اوشبو بوزیب کیریشلر می آییده «اریگولر» شرکتی تامانیدن اۉتکزیلگن سیناو دایرهسیده صادر بۉلگنینی تصدیقلهدی. اوشبو کمپنی اوّل «اوپن ایآی»، «انتروپیک» و «میتا» بیلن باغلیق شونگه اۉخشش حادثهلرده هم اشتراک اېتگن.
بو گوگلنینگ یسمه آنگ واسطهلریدن بیری اتوماتیک طرزده بوندهی حرکتنی عملگه آشیرگنی بیلن باغلیق ایلک حالتدیر.
«والاستریت ژورنال» نینگ یازیشیچه، گوگل اوشبو واقعه شو هفتهگچه، یعنی نشر ایضاح آلیش اوچون کمپنی بیلن باغلنگونیگه قدَر آشکار قیلمهگن.
گوگل بو بوزیب کیریشلرنی عامهگه آشکار قیلیشنی طلب قیلهدیگن درجهده جدّي دېب حسابلهمهگنینی ایتگن. شرکت معلوماتیگه کۉره، یسمه آنگ مۉدلی تېگیشلی کمپنیلرگه ضرر یېتکزمهگن و حقیقي کمپنی تیزیمیگه، سیمولیهتسيه قیلینگن تیزیمگه اېمس، کیرگنینی انگلهگن زهاتی هر سفر اۉپراسیوننی توختهتگن.
گوگل خوفسیزلیک مهندسلیگی بۉییچه اۉرین باسری هِدِر اَدکینز بیاناتیده شوندهی دېدی: «بو واقعه کوچلی یسمه آنگ مۉدللرینی مسوولیتلی خطی-حرکتگه اۉرگهتیش مهملیگینی کۉرسهتهدی. بو حالتده مۉدل تېگیشلی خطی-حرکتنی نمایش اېتدی.»
بیراق یسمه آنگ خوفسیزلیگی بۉییچه «ارریدار» استارتاپ باش دیرېکتوری و «هکر کلاه سفید» اما جک کیبل «والاستریت ژورنال» بېرگن صحبتیده، اونینگ فکریچه، بو ایضاح کۉپراق حادثه نینگ قنچهلیک جدّي اېکنیگه اعتبار قرهتهدی. اساسي مسأله اېسه یسمه آنگ اگېنتی تصادفن باشقه بیر شرکتنینگ تیزیملرینی بوزگنیدهدیر.
اونینگ ایتیشیچه: «اولر بو مسألهده ضعیفلیکلرنی آشکار قیلیش ساحهسیده شکللنگن معیارلرگه تهیهنیشگه اورینهیاتگنگه اۉخشهیدی، حالبوکه بو بوتونلهی باشقه مسأله. بوندن هم کتّه معما شوندهکی، مۉدللر فعالیت یوریتیشی کېرهک بۉلگن چېگرهدن چیقیب، حقیقي کیبرهوجوملرنی عملگه آشیرماقده. مېنیمچه، آدملر بو حقده بیلیشگه حقلی.»
بو واقعه یسمه آنگ امکانیتلری و اوشبو تکنالوژينی ایشلب چیقیش خوفسیزلیگی بارهسیدهگی خواطرلر کوچهییب بارهیاتگن بیر پیتده آشکار بۉلدی.
