بیرلشگن ملتلر تشکیلاتی باش کاتبی آنتونیو گوترش دنیاده هستوي فلاکت خوفی قَیتگنینی ایتدی.
جناب گوترش بوگون (شنبه، ۴-مبزان) ایکس اجتماعي ترماغیده پیام نشر قیلیب، خوفسیز و تینچ دنیا اوچون سعی-حرکتلرنی کوچهیتیریشگه چقیردی.
بیرلشگن ملتلر تشکیلاتی باش کاتبی شوندهی دېدی: «هستوي فلاکت خوفی قَیتدی. اما موفقیتسیزلیکلر قطعیتیمیزنی ضعیفلشتیریشیگه یۉل قۉیمسلیگیمیز کېرهک.»
او ینه شوندهی قۉشیمچه قیلدی: «حاضر بۉلینیشدن کۉره ملاقاتنی، قرهمه-قرشیلیکدن کۉره دیپلوماتيهنی و ویرانهگرچیلیکدن کۉره قورالسیزلنیشنی اوستون قۉییش وقتی کېلدی.»
آنتونیو گوترش دنیا تینچلیگینی تأمینلش اوچون سعی-حرکت قیلیشگه چقیریب، شوندهی دېدی: «کېلینگ، برچه اوچون خوفسیزراق و تینچراق دنیا برپا اېتهیلیک.»
روسيه نینگ اوکراینگه قرشی اوروشی همده امریکا و اسرایل نینگ ایرانگه قرشی اوروشی باشلنگنیدن سۉنگ هستوي فلاکت یوز بېریشی حقیدهگی خواطرلر کوچهیدی.
بیرلشگن ملتلر تشکیلاتی امریکانی ایران بیلن اوروش و هستوي انشااتلرگه هجوملر چاغیده هستوي فلاکت یوز بېریشی نینگ آلدینی آلیشگه بیر نېچه بار چقیرگن. امریکا ایران نینگ اوچته فعال هستوي انشااتی (نطنز، فردو و اصفهان)گه هجوم قیلگن، بیراق متخصصلر حاضرچه رادیاتسیه ترقهلیشی نینگ بېواسطه خوفی موجود اېمسلیگینی ایتگن.
سۉنگگی آیلرده آمریکا جمهور رییسی دونالد ترامپ ایران نینگ ینه بیر مهم هستوي انشااتی«کوه کلنگ»، گه هم هجوم قیلیشینی بیر نېچه بار آگاهلنتیرگن.
