مریم بنت علی بن ناصر المسند نینگ ایتیشیچه، قطر افغانستان‌نینگ کېله‌جگی افغانلر نینگ اۉزلری باشچیلیگیده‌گی کینگ قمراولی سیاسي جریان آرقه‌لی بېلگیلنیشی کېره‌ک، دېب حسابله‌یدی. اونینگ تأکیدلشیچه، بو جریانده افغانستان‌نینگ حاکمیتی، مستقللیگی و حدودي یخلیتلیگیگه حرمت ضرور.
او بو فکرلرنی سه‌شنبه کونی (۲۸-میزان) «افغانستاننی موافقلشتیریش گروهی ییغیلیشی»ده بیلدیرگن. مذکور ییغیلیش ۲۰–۲۱-اکتوبر کونلری دوحه‌ده اۉتکزیلماقده.
قطر تشقی ایشلر وزیرلیگی خبریگه کۉره، مریم بنت علی بن ناصر المسند نطقیده افغانستان هر قچانگیدن هم برقرار خلق‌ارا همکارلیک، انیق اوستوار یۉنه‌لیشلر و عملي همکارلیککه محتاج اېکنینی تأکیدله‌گن.
اونینگ ایتیشیچه، دوحه مرکّب و قیین مسأله‌لر ملاقات یۉلی بیلن حل قیلینیشی کېره‌ک، دېگن قره‌شنی دایما قۉللب-قوّتلب کېلگن.
قطر رسميسی دوحه مذاکره‌لریگه توخته‌لر اېکن، مملکتی ملاقات و دیپلوماتيه‌گه اساسلنگن تینچ یۉللرنی قۉللب-قوّتلشینی ایتگن.
دوحه مذاکره‌لری ترکیبیگه امریکا و طالبلر اۉرته‌سیده‌گی ۲۰۲۰-ییلده «دوحه کېلیشووی» نامی بیلن مشهور بۉلگن و امریکا قۉشینلری نینگ افغانستاندن آلیب چیقیلیشیگه آلیب کېلگن مذاکره‌لر، شونینگدېک، طالبلر بیلن افغانستان نینگ سابق حکومتی اۉرته‌سیده‌گی نتیجه‌سیز مذاکره‌لر کیره‌دی.
قطر ۲۰۱۳-ییلدن بویان دوحه‌ده طالبلرنینگ سیاسي اداره‌سیگه مېزبانلیک قیلیب کېلماقده.
حاضر هم بو دولت طالبلر بیلن یقین علاقه‌لرگه اېگه بۉلیب، غرب دولتلری و طالبلر اۉرته‌سیده واسطه‌چیلیک قیله‌یاتگن دولت صفتیده کۉریله‌دی.
شونینگدېک، دوحه بیرلشگن ملتلر تشکیلاتی رهبرلیگیده‌گی «دوحه جریانی»گه مېزبانلیک قیلماقده.
المسند نینگ ایتیشیچه، اوشبو جریان افغانستان بیلن ینه‌ده ایزچیل و موافقلشتیریلگن خلق‌ارا همکارلیک اوچون اساس یره‌تگن.
اونینگ تأکیدلشیچه، افغانستاننی اونینگ منطقوي محیطیدن یاکه خلق‌ارا همجعیت آلدیده تورگن معمالردن علیحده کۉریب بۉلمه‌یدی.
اونگه کۉره، افغانستانده‌گی برقرارلیک نه‌فقط بو مملکت خلقی، بلکه منطقوي خوفسیزلیک، اقتصادي علاقه‌لر و خلق‌ارا تینچلیک اوچون هم مهم‌دیر.
یاردمنی دوام اېتتیریشگه چقیریق
قطر رسميسی افغانستان کتّه باسیملرگه دوچ کېله‌یاتگنینی و مملکتده‌گی انسان پرورلیک احتیاجلر نهایتده کېنگ اېکنینی ایتگن.
او اقتصادی ضعیفلیک عایله‌لر، جمعیتلر و تجارت فعالیتیگه تأثیر کۉرسه‌ته‌یاتگن بیر پیتده، مهاجرلر نینگ قَیتیشی و اهالی‌نینگ کۉچیریلیشی باسیمنی ینه‌ده کوچه‌یتیره‌یاتگنینی تأکیدله‌گن.
شو بیلن بیرگه، او انسان پرورلیک یاردم اوچون اجره‌تیله‌دیگن مبلغلر سېزیلرلی درجه‌ده کمه‌یگنینی، حال‌بوکه ساغلیقنی سقلش، آزیق-طعام و طعاملنیش، تعلیم، سوو همده آزیق-طعام خوفسیزلیگی کبی اساسي ساحه‌لرده یاردمگه احتیاج همان جوده یوقاری اېکنینی بیلدیرگن.
المسند وضعیتنی حل قیلیش دونر دولتلر، بیرلشگن ملتلر تشکیلاتی، خلق‌ارا مالیه انستیتوتلری، منطقوي تشکیلاتلر و اجراچی همکارلر اۉرته‌سیده‌گی یقین موافقلشتیریشنی طلب قیلیشینی تأکیدله‌گن.
اونینگ ایتیشیچه، یاردم شفّاف، حسابدار و گومانیتار تمایللرگه موافق طرزده یېتکزیلیشی کېره‌ک.
قطر دولت وزیری افغانستان خلقی اولرگه یاردم بېریشگه حرکت قیله‌یاتگن تشکیلاتلر نینگ نهادیلشگن سعی-حرکتلری ترقاقلیگی یاکه قره‌مه-قرشی یاندشوولری نینگ عاقبتلرینی باشدن کېچیرمسلیگی کېره‌کلیگینی تأکیدله‌گن.
قطر دولتی نینگ خلق‌ارا همکارلیک مسأله‌لری بۉییچه وزیری مملکتی ملي انستیتوتلری آرقه‌لی، شونینگدېک، بیرلشگن ملتلر تشکیلاتی و خلق‌ارا همکارلر بیلن یقیندن همکارلیکده افغانستانده‌گی گومانیتار و رواجلنیش سعی-حرکتلرینی قۉللب-قوّتلشده دوام اېتیشینی ینه بیر بار تأکیدله‌گن.
اونینگ قید اېتیشیچه، اساسي مقصد یاردمنی اېنگ محتاج آدملرگه، جمله‌دن، عیاللر و یاشلرگه یېتکزیشدیر. چونکه بو گروهلر افغانستان نینگ اجتماعي و اقتصادي کېله‌جگینی شکللنتیریشده مهم ا‌ۉرین توته‌‌دی.
او افغانستاننی موافقلشتیریش گروهی «دوحه جریانی» نینگ جدللیگینی سقلب قالیش اوچون حرکت قیلیشی و افغانستان خلق‌ارا کون ترتیبی نینگ اوستوار مسأله‌لریدن بیری بۉلیب قالیشینی تأمینلشی کېره‌کلیگینی ایتگن.
اونینگ سۉزلریگه کۉره، تخنیکي همکارلیک کېنگراق سیاسي جریان بیلن بیر قطارده آلیب باریلیشی کېره‌ک، اما اونینگ اۉرنینی اېگه‌لله‌مسلیگی لازم.
المسند نطقی‌نینگ یکونیده اوشبو ییغیلیشدن عمومي اوستوار یۉنه‌لیشلرنی ینه‌ده انیق بېلگیلش، عملي همکارلیکنی کوچه‌یتیریش و افغانستان خلقی آلدیده‌گی مجبوريتلرنی ینگیلش اوچون فایده‌لنیش کېره‌کلیگینی تأکیدله‌گن.
