افغانستان‌نینگ بیرلشگن ملتلر تشکیلاتیده‌گی نماینده‌لیگی‌نینگ سرپرستی نصیر احمد فایق، افغانستان خلقی‌نینگ مملکت کېله‌جگینی شکللنتیریشده‌گی مضمونلی اشتراکی کفالتلنیشی کېره‌کلیگینی ایتدی.
فایق بوگون (شنبه، ۲ عقرب) بیرلشگن ملتلر تشکیلاتی تشکیل تاپگنی نینگ ۸۱ ییللیگی و افغانستان‌نینگ اوشبو تشکیلاتگه اعضا بۉلگنیگه ۸۰ ییل تۉلیشی عرفه‌سیده ایتدیکی: «افغانستان بیرلشگن ملتلر تشکیلاتیده اۉز حصه‌سینی قۉشیب کېلگن؛ خودّی شو کبی، اوشبو تشکیلات هم ترقیات، کۉچکینلیک و نزاعلر دوریده افغانستان خلقی بیلن بیرگه بۉلگن.»
او قۉشیمچه قیلدی: «بوگون بو اشتراکنی قیته‌دن تیکلشیمیز و مستحکملشیمیز کېره‌ک: انسانپرورلیک یاردملرینی دوام اېتتیریشیمیز، عیاللر و قیزلرنینگ حقوقلرینی حمایه قیلیشیمیز، افغانلرنینگ مملکت کېله‌جگینی شکللنتیریشده‌گی مضمونلی اشتراکینی کفالتلشیمیز و تینچ همده اینکلیوزیو افغانستانگه اېریشیش یۉلیده حرکت قیلیشیمیز کېره‌ک. بو افغانستان خلق‌ارا مجبوریتلریگه عمل قیله‌دیگن همده اۉزی و قۉشنیلری بیلن تینچ-تاتوو یشه‌یدیگن مملکت بۉلیشی لازم.»
طالبلر افغانستانده قَیته حاکمیتنی اېگه‌له‌گنیدن بېری خلق‌نینگ مملکت تقدیرینی بېلگیلشده‌گی اشتراکی یۉققه چیقریلدی. بونگچه خلق جمهور رئیسلیک سیلاولری، ملي کېنگش و ولایت کېنگشلری سیلاولری آرقه‌لی مملکت‌نینگ سیاسي تقدیرینی بېلگیلشده اشتراک اېتردی.
سۉنگگی بېش ییلدن آرتیق وقت دوامیده بیرلشگن ملتلر تشکیلاتی و دنیانینگ تورلی مملکتلری افغانستانده همه شمول و برچه قتلملرنی قمرب آلووچی حکومت توزیلیشیگه اورغو بېریب کېلماقده، بیراق بو سعی-حرکتلر حاضرگچه هېچ قنده‌ی نتیجه بېرمه‌دی.
