طالبلر باش وزیری نینگ اقتصادي مسأله‌لر بۉییچه اۉرین‌باسری اداره‌سی جوزجان ولایتیده‌گی «جنگل-کلان» طبيعي گاز کانینی قزیب آلیش همده بغلان ولایتی نینگ پلخمری اولسواللیگی‌نینگ کۉمیر قزیب آلیش و اوندن برق انرژیسی ایشلب چیقریش بۉییچه شرطنامه‌لر امضالنگنینی معلوم قیلدی. اوشبو شرطنامه‌لر طالبلرنینگ کان و پترولیم وزیرلیگی، «دولت کارخانه‌لری عمومی اداره‌سی» همده «عزیزی کمپنیلر گروهی» اۉرته‌سیده امضالنگن.
مذکور اداره‌‌نینگ بیاناتیگه کۉره، شرطنامه‌لر بوگون (چهارشنبه، ۱۳ عقرب) کابلده‌گی اخبارات مرکزیده طالبلر باش وزیری‌مینگ اقتصادي مسأله‌لر بۉییچه اۉرین‌باسری عبدالغنی برادر اشتراکیده امضالنگن.
طالبلر باش وزیری اۉرین‌باسری اداره‌سی نینگ معلوم قیلیشیچه، اوشبو لایحه‌لرنینگ هر بیری تخمیناً مینگ مېگاوات برق انرژیسی ایشلب چیقریش قوّتیگه اېگه بۉلیشی رېجه‌لشتیریلگن و اولر بۉییچه شرطنامه‌لر ۳۰ ییل مدتگه امضالنگن.
اداره قۉشیمچه قیلیشیچه، «اوشبو لایحه‌لردن کۉزلنگن مقصد مملکت ایچیده برق انرژیسی ایشلب چیقریشنی کۉپه‌یتیریش، انرژی خوفسیزلیگینی مستحکملش و اقتصادي اۉسیشنی قۉللب-قوّتلشدن عبارت».
طالبلر باش وزیری اۉرین‌باسری اداره‌سی‌نینگ تأکیدلشیچه، هر ایکّی لایحه بې‌واسطه و بالواسطه قریب بېش مینگ کیشینی ایش بیلن تأمینلشی کوتیلماقده.
طالبلر بوندن اوّل هم انرژی ساحه‌سیده‌گی اَیریم لایحه‌لرنی عملگه آشیریش و بیر قطار کانلرنی قزیب آلیش بۉییچه «عزیزی کمپنیلر گروهی» بیلن شرطنامه‌لر امضاله‌گن همده اولر نینگ عمومي قیمتینی ۱۰میلیارد دالردن آرتیق دېب اعلان قیلگن اېدی.
«عزیزی گروپ» افغانستان‌نینگ تنیقلی تجارلریدن بیری میرویس عزیزی تامانیدن تشکیل اېتیلگن کمپنیلر مجموعه‌سیدیر.
میرویس عزیزی «عزیزی بانک» و «افغانستان اسلام بانکی» ناملی ایکّی خصوصي بانک نینگ هم اېگه‌سی حسابلنه‌دی. او طالبلر افغانستانده حاکمیتنی قَیته اېگه‌له‌گنیدن سۉنگ مملکت‌نینگ انرژی ساحه‌سیگه سرمایه کیریتیشگه قیزیقیش بیلدیرگن.
