اوکراین جمهور رییسی والادیمیر زلنسکي روسيه‌‌نینگ اوکراین جَنوبی-شرقیده‌گی مکتبگه اویوشتیرگن هجومی عاقبتیده ۳۳ کیشی هلاک بۉلگنینی معلوم قیلدی. مذکور مکتب انسان پرورلیک یاردم ترقه‌تیش مرکزی و باش‌پناه صفتیده فایده‌لنیلگن.
رویترز آژانسی‌نینگ خبر بېریشیچه، زلنسکي بوگون (سه‌شنبه، ۱۲عقرب) برلینده بۉلیب اۉتگن مطبوعات انجمنیده اوشبو هجوم دوشنبه کونی ژاپوریژیا ولایتی‌نینگ «کومیشو واخا» قیشلاغیده صادر اېتیلگنینی ایتگن. اونینگ تأکیدلشیچه، ینه ۵۰کیشی ویرانه‌لر آستیده قالگن.
اونینگ سۉزلریگه کۉره، روسيه‌لیکلر دستلب آدملر یاردم ترقه‌تیله‌دیگن جایگه یېتیب کېلگن پیتده هوادن بیر نېچته بۉمبه تشله‌گن، سۉنگره باش‌پناه اوستیگه ینه بیر نېچه بۉمبه یاغدیرگن.
اوکراین جمهور رییسی اوشبو هجومنی «دهشتلی ترورچیلیک هجومی» دېب اته‌گن.
زلنسکي روسيه‌لیکلر «کومیشواخا»ده قالگن اهالی هر هفته انسانپرورلیک یاردمی آلیش اوچون شو یېرگه تۉپلنیشینی بیلمه‌گن بۉلیشی ممکن اېمسلیگینی تأکیدله‌گن.
اونینگ قۉشیمچه قیلیشیچه، آدملر هر دوشنبه کونی یاردم آلیش اوچون اوشبو جایده ییغیلیشگن.
رویترز خبریگه کۉره، روسيه مدافعه وزیرلیگی هجوم «کومیشواخا» اطرافی و ژاپوریژیا ولایتیده‌گی ینه ایکّیته اهالی پونکتیده جایلشگن اوکراین حربي بۉلینمه‌لریگه قرشی عملگه آشیریلگنینی معلوم قیلگن.
وزیرلیک هجوم عاقبتیده ۲۵ کیشی اوکراینلیک حربي هلاک بۉلگنینی، ۱۵ ته موتر همده الکترون اوروش ستشن‌سی یۉق قیلینگنینی بیلدیرگن.
ژاپوریژیا ولایتی پولیسی هم پولیس خادملری و قوتقروو گروهلری ویرانه‌لر آستیده قالگن بۉلیشی ممکن بۉلگن اهالیگه یېتیب باریش اوچون حرکت قیله‌یاتگنینی معلوم قیلگن.
رویترز خبریگه کۉره، اجتماعي ترماقلرده ترقه‌لگن تصویرلرده حدود بۉیلب ساچیلیب یاتگن، قسماً یانیب کېتگن ویرانه‌لرنی کۉریش ممکن.
مذکور هجوم محلي مقیاسده‌گی آلتی کونلیک صلح یکونلنگنیدن بیر کون اۉتیب صادر بۉلگن. اوشبو صلح خرسون ولایتی‌نینگ جَنوبی-غربیده جایلشگن آلېشکی شهریگه انسانپرورلیک یاردمینی یېتکزیش و حدودنی ترک اېتیشنی ایسته‌گن اهالینی ترک قیلیش مقصدیده جاري اېتیلگن اېدی.
