طالبلرنینگ فراه ولایتی امنیه قوماندانلیگی «شیبکوه» اولسواللیگیده اوشبو گروه کوچلری بیلن «قوراللی تالانچیلر» اۉرتهسیده یوز بېرگن آتیشمهده بیر گماندار اۉلدیریلگن ینه بیری یرهلنگنی حقیده معلوم قیلدی.
قوماندانلیک بیاناتیگه کۉره، گماندارلر قیدیرووده بۉلگن و بوگون (شنبه، ۲۰-سرطان) «شیبکوه» اولسواللیگینینگ «حوزه» منطقهسیده اۉققه توتیلگن.
طالبلرنینگ معلوم قیلیشیچه، ینه بیر گماندار قۉلگه آلینگن، تۉرتینچی شخص اېسه واقعه جاییدن قاچیشگه موفق بۉلگن.
بیاناتده ایتیلیشیچه، گماندارلر کېچه تونده بیر تورر جایدن۴۵.۵میلیون ایران تومنی،۵مینگ افغاني همده بیر دانه تۉپّانچهنی اۉغیرلب کېتگن و شوندن سۉنگ طالبان کوچلری تامانیدن قیدیرووگه بېریلگن.
طالبلرنینگ بیلدیریشیچه، گماندارلر یانیدن کېچه اۉغیرلنگن بویوملردن تشقری ینه ایکّی دانه تۉپّانچه و «لوکسل» روسوملی موتر هم تاپیلگن.
سۉنگّی وقتلرده افغانستان نینگ تورلی ولایتلریدن قوراللی تالانچیلیک حالتلری حقیده کۉپلب خبرلر کېلماقده. بو اېسه اهالی آرهسیده خواطرنی کوچهیتیرگن.
مذکور حادثهلر طالبان مملکتده تۉلیق خوفسیزلیک تأمینلنگنینی دعوا قیلیب کېلهیاتگن بیر پیتده صادر بۉلماقده.
