طالبلرنینگ مالیه وزیرلیگی اوشبو گروه رهبری هبتالله آخوندزاده نینگ آغزهکی فرمانی و وزیرلیک پیشنهادیگه بناءً حکمی همده حقیقی شخصلرنینگ درآمد سالیغی، نفت-گاز تجارت و سرمایه اۉتکزمهلریگه سالینهدیگن سالیقلر کمهیتیریلگنینی معلوم قیلدی.
وزیرلیک بوگون (یکشنبه، ۲۱-سرطان) کابلده اۉتکزیلگن مطبوعات انجمنیده ینگی سالیق امتیازلرینی اعلان قیلدی.
وزیرلیکنینگ بیلدیریشیچه، ینگی کۉرسهتمهگه موافق حکمی شخصلرنینگ درآمد سالیغی۲۰ فایزدن۱۰ فایزگه توشیریلگن. سرمایه اۉتکزمهلریگه قۉللنهدیگن قطعي سالیقی اېسه ۱ فایزدن۰.۵فایزگه کمهیتیریلگن.
شونینگدېک، حقیقی شخصلر اوچون آیلیک درآمد سالیغیدن آزاد اېتیلهدیگن مقدار ۵ مینگ افغانيدن۱۰ مینگ افغانيگه، ییللیک درآمد بۉییچه سالیق امتیازی اېسه۶۰مینگ افغانيدن۱۲۰ مینگ افغانيگه آشیریلگن. بوندن تشقری، ۲ فایزلیک نورم» بېکار قیلینگن.
وزیرلیککه کۉره،۱۲۰مینگدن ۱ میلیون۲۰۰ مینگ افغانيگچه بۉلگن ییللیک درآمدگه۱۰ فایزلیک سالیق قۉللنهدی.۱ میلیون۲۰۰ مینگ افغانيدن آرتیق درآمد آلووچیلر اېسه۱۰۸ مینگ افغاني مقداریدهگی ییللیک قطعي سالیقدن تشقری۱۵فایزلیک سالیق هم تۉلهیدی.
طالبان مالیه وزیرلیگی ایچکی سوداگرلر تامانیدن نفت و گاز سوداسیگه قۉللنهدیگن سالیقلر هم کمهیتیریلگنینی بیلدیردی.
وزیرلیک معلوماتیگه کۉره، نفت محصولاتلرینی تُن حسابیده یاکه اولگورجی ساتهدیگن و اۉز نفت-گاز ذخیرهسیگه اېگه بۉلگن تدبیرکارلر هر بیر تُن اوچون۵۰افغاني سالیق تۉلهیدی.
نفت-گاز انباری یاکه ادارهسیگه اېگه بۉلمهگن، بیراق کمیسیون اساسیده سودا قیلهدیگن شخصلر اېسه تۉرت طایفهگه اجرهتیلگن.
اوشبو تصنیفگه کۉره، بیرینچی، ایکّینچی، اوچینچی و تۉرتینچی طایفهدهگی کمیسیون واسطهچیلری ییلیگه ماس روشده۱۰۰مینگ، ۷۰ مینگ،۵۰ مینگ و۲۴ مینگ افغاني قطعي سالیق تۉلهیدی.
نفت و گازنی اولگورجی خرید قیلیب، چکنه ساتهدیگن شخصلر اېسه هر بیر تُن اوچون۸۰افغاني سالیق تۉلهشگه مجبور بۉلهدی.
طالبلر مالیه وزیری ملا محمد ناصر ینگی سالیق امتیازلری و چېگیرمهلری فقرالر اوچون کۉپراق قولهیلیک یرهتیشینی همده سالیقلرنی اۉز وقتیده تۉلهشگه یاردم بېریشینی تأکیدلهدی.
طالبلر افغانستانده حاکمیتنی قَیته اېگهلهگنیدن سۉنگ دولت بودجهسی نینگ اساسي قِسمینی سالیقلر و مملکت کانلرینی قزیب آلیشدن توشهدیگن درآمدلر حسابیدن شکللنتیریب کېلماقده.
شونگه قرهمهی، فقرالر بیر نېچه بار اوشبو گروهنی تنقید قیلیب، ییغیلهیاتگن سالیقلر عوضیگه اهالیگه یېترلی و صفتلی دولت خدمتلری کۉرسهتیلمهیاتگنینی تأکیدلب کېلماقده.
