غورده سابق ملي خوفسیزلیک خادیمی نامعلوم قوراللی کیشلر تامانیدن اۉلدیریلدی.
منبعلر غور ولایتی تيوره اولسواللیگی ملي خوفسیزلیک ادارهسینینگ سابق اۉپراتیف باشلیغی عبدالله رحیمی قوراللی شخصلر تامانیدن اۉلدیریلگنینی تصدیقلهدی.
بیر منبعنینگ اطلاعات روزگه معلوم قیلیشیچه، رحیمی تيوره اولسواللیگینینگ «زرنی» قیشلاغیده یشهگن و تیناوون (شنبه، ۲۰-سرطان) کېچقورون مسجددن اوییگه قَیتهیاتگنیده اۉلدیریلگن.
منبعنینگ محل یشاوچیلریگه تهیهنیب ایتیشیچه، هجومچیلر حربي کییمده بۉلگن.
منبعگه کۉره، رحیمی جمهوریت حکومتی قولهگنیدن سۉنگ اۉز قیشلاغیده عادي حیات کېچیرهیاتگن اېدی.
شونینگدېک، منبع نینگ ایتیشیچه، سابق حکومت خادیمینینگ هېچ کیم بیلن شخصي عداوتی بۉلمهگن. شونگه قرهمهی، اونینگ اۉلدیریلیش سببی و بو قاتللیکنی صادر اېتگن شخصلر حاضرچه نامعلوم.
سۉنگّی بېش ییل دوامیده، طالبلر رهبری اعلان قیلگن عمومي عفوگه قرهمهی، سابق حکومتنینگ کۉپلب حربي و خوفسیزلیک خادملری سِرلی طرزده اۉلدیریلگن. طالبلر اعضالری سابق حربيلرنی قصاص آلیش مقصدیده اۉلدیریشده عیبلنماقده، بیراق طالبلر بو عیبلاولرنی رد اېتیب کېلماقده.
