طالبلر تشقی ایشلر وزیری امیرخان متقی، ایران تشقی ایشلر وزیرلیگی نینگ قنسوللیک ایشلری بۉییچه اۉرینباسری وحید جلالزاده بیلن اوچرهشیب، مذاکره اۉتکزدی.
طالبلر تشقی ایشلر وزیرلیگینینگ معلوم قیلیشیچه، بوگون (دوشنبه، ۲۲-سرطان) کابلده بۉلیب اۉتگن اوچرهشووده تامانلر ایکّی تامانلهمه مناسبتلر، آدملرگه قنسوللیک خدمتلرینی یخشیلش و چېگره همکارلیگی مسألهلرینی محاکمه قیلگن.
اوچرهشووده امیرخان متقي یشاوچیلرگه کۉرسهتیلهیاتگن قنسوللیک خدمتلری آسانراق، تېزراق و خلقارا تن آلینگن ستندردلرگه موافق بۉلیشی کېرهکلیگینی تأکیدلهگن.
شونینگدېک، او طالبلر و ایران اۉرتهسیدهگی مناسبتلر رواجلنیب بارهیاتگنینی بیلدیرگن.
طالبلر تشقی ایشلر وزیرلیگی بیاناتیگه کۉره، ایران تشقی ایشلر وزیرلیگی نمایندهسی هم ایکّی مملکت اۉرتهسیدهگی قنسوللیک موافقلشتیرووی مهملیگینی قید اېتیب، طالبان بیلن دوام اېتهیاتگن مذاکرهلر هر ایکّی دولت یشاوچیلری اوچون قنسوللیک ایشلرینی یخشیراق تشکیل اېتیش و امکانیتلرنی کېنگهیتیریشگه خدمت قیلیشیگه امید بیلدیرگن.
ایران تشقی ایشلر وزیرلیگی نینگ کانسوللیک ایشلری بۉییچه اۉرینباسری بوگون اېرتهلب کابلگه یېتیب کېلیب، سفریدن مقصد ایران و طالبلر اۉرتهسیدهگی بېشینچی قۉشمه قنسوللیک ییغیلیشینی اۉتکزیش اېکنینی ایتگن.
ایران طالبلر افغانستانده ینه حاکمیتنی اېگهلهگنیدن بویان اوشبو گروه بیلن کېنگ کۉلملی سیاسي و اقتصادي علاقهلرنی یۉلگه قۉیگن همده افغانستان نینگ تهراندهگی اېلچیخانهسی و قنسوللیکلرینی طالبلر نمایندهلریگه تاپشیرگن.
شونینگدېک، ایراننینگ کابلدهگی اېلچیخانهسی و افغانستاننینگ بیر نېچه ییریک شهرلریدهگی قنسوللیکلری فعالیتینی دوام اېتتیرماقده. بیراق اولرنینگ خدمتلری، جملهدن، افغانستان یشاوچیلریگه ویزه بېریش جریانی چېکلنگن. حاضرده افغانستان یشاوچیلری اوچون ایران ویزهلرینی عادتي ترتیبده بېریش تۉختهتیلگن. ویزهلر فقط ایران ایش بېرووچیلریدن تکلیفنامهگه اېگه شخصلر، ایرانگه یقین سیاسي، دیني و مدني همده طالبلر رسمیلریگه بېریلماقده.
