جهان ساغلیقنی سقلش تشکیلاتینینگ معلوم قیلیشیچه، جاري هفتهده افغانستانده پولیو کسللیگینینگ تۉرتته ینگی مثبت حالتی قید اېتیلگن. شو بیلن۲۰۲۶-ییل باشیدن بویان مملکتده اوشبو کسللیک نینگ۱۱ ته مثبت حالتی رۉیخطگه آلینگن.
جهان ساغلیقنی سقلش تشکیلاتی بوگون، چهارشنبه،۲۴-سرطان، نشر قیلگن حساباتگه کۉره، ینگی حالتلرنینگ ایکّیتهسی ننگرهار ولایتینینگ بهسود و رودات اولسواللیکلریده، بیرتهسی هلمند ولایتینینگ موسی قلعه اولسواللیگیده همده بیرتهسی هرات ولایتینینگ شیندند اولسواللیگیده انیقلنگن.
تشکیلاتنینگ قۉشیمچه قیلیشیچه، هرات ولایتینینگ شیندند اولسواللیگیده قید اېتیلگن حالت “مثبت تماسلر” آرقهلی انیقلنگن.
حساباتگه کۉره، جاري هفتهده افغانستانده پولیو ویریوسنینگ 12ته مثبت (اطراف-محیط) نمونهسی هم قید اېتیلگن. اولردن بېشتهسی قندهارده، تۉرتتهسی ننگرهارده، ایکّیتهسی کابلده و بیرتهسی هلمندده انیقلنگن.
جهان ساغلیقنی سقلش تشکیلاتی معلوماتیگه کۉره، جاري ییل دوامیده افغانستانده پولیو ویروسنینگ۴۶ته مثبت اطراف محیط حالتی قید اېتیلگن.
اۉتگن ییلی اېسه مملکتده پولیونینگ۲۱ ته انساني حالتی و۹۴ ته اطراف محیط حالتی رۉیخطگه آلینگن اېدی.
حاضرده افغانستان و پاکستان پولیو کسللیگی حلی تۉلیق یۉق قیلینمهگن دنیادهگی یگانه ایکّی دولت حسابلنهدی. جهان ساغلیقنی سقلش تشکیلاتی حساباتلریگه کۉره، جاري ییلده پاکستانده هم پولیونینگ اوچته مثبت حالتی قید اېتیلگن.
