محمد داوود (مستعار)، افغانستان جَنوبیدهگی قندهار شهری اهالیسیدن بیری، اۉغلی نینگ جزاسی فقط عامه آلدیده۳۹درّه اوریلیشی بیلن چېکلنمهگنینی، بلکه بوتون عایلهسی نینگ حیاتینی اۉزگرتیریب یوبارگنینی ایتهدی. اونینگ سۉزلریگه کۉره، حکم اجرا اېتیلگنیدن سۉنگ عایلهسی جمعیت نینگ ملامتی و اجتماعي چېتلهتیلیشیگه دوچ کېلگن. اۉزی اېسه روحي و اجتماعي باسیم شو قدَر کوچهیگنکی، بعضن حیاتیگه یکون یسهش حقیده هم اۉیلهیدی.
محمد داوود نینگ اۉغلی بیر قیز بیلن جنسي علاقهده بۉلگنلیک عیبی بیلن حبسگه آلینگن. او طالبان قماقخانهسیده قریب یېتّی آی سهقلنگن، شوندن سۉنگ طالبان قاضیسی اونی عامه آلدیده درّه بیلن جزالش حکمینی چیقرگن. بیراق محمد داوود نینگ تاکیدلشیچه، اۉغلی عدالتسیزلیک قربانی بۉلگن. اونینگ ایتیشیچه، اۉشه قیز بیلن طالبان نینگ بیر نېچه اعضاسی هم جنسي علاقهده بۉلگن، اما گروه ایچیدهگی تاثیر و قۉللب-قوّتلش طفیلی اولر تعقیب و جزادن چېتده قالگن.
او اطلاعات روزگه شوندهی دېدی: «بیر میسهزارده اۉغلیمگه۳۹ درّه اوریشدی. عیبلاو اونگه بیر قیز بیلن ناقانوني مناسبتده بۉلگنلیگی اېدی. اما ایشا نینگ، اۉغلیم بو واقعهدن حتا خبری هم یۉق اېدی. اۉشه قیز بیلن ینه بیر نېچه طالب هم ناقانوني مناسبتده بۉلگن، بیراق اولر طالبان ایچیده تنیش-بیلیشی بۉلگنی اوچون درّه جزاسیدن قوتولیب قالیشدی، اولر نینگ اۉرنیگه اېسه مېنینگ اۉغلیم جزالندی.»
محمد داوود نینگ ایتیشیچه، او عدالت ایزلب، حتا طالبلر رهبری ملا هبتالله آخوندزاده نینگ ادارهسیگچه مراجعت قیلگن. بیراق طالبان نینگ هېچ بیر عملداری اونینگ شکایتینی کۉریب چیقمهگن.
اونینگ فکریچه، عامه آلدیده درّه اوریش فقط جسماني جزا اېمس، بلکه محکوملر و اولر نینگ عایلهلری شانی همده جمعیتدهگی آبروسینی هم نشانگه آلهدی و اونینگ عاقبتلری ییللر دوام اېتهدی.
محمد داوود نینگ تاکیدلشیچه، اگر طالبان درّه جزاسینی اجرا اېتیشده قطعی تورسه، هېچ بۉلمهگنده اونی آدملر کۉز اۉنگیده عملگه آشیرمسلیگی کېرهک. چونکه بوندهی حالتده محکوملر و اولر نینگ عایله اعضالری شرمندهلیک همده اجتماعي چېتلهتیلیش بیلن یوزمه-یوز قالماقده.
شلاقنی تماشا قیلیش
سیدالله، قندهار ولایتی اهالیسیدن بیری، بیر مرته طالبان تامانیدن محکوملرگه نسبتاً درّه جزاسی اجراسینی تماشا قیلیش اوچون بارگنینی، اما حاضر بو تجربهسیدن افسوسلنیشینی و اېندی هېچ قچان بوندهی تدبیرلرده قتنهشمسلیگینی ایتهدی.
سیدالله اطلاعات روزگه ایتیشیچه، طالبان نینگ بوندهی مراسملرده قتنهشیش آدملر اوچون «عبرت» بۉلیشی و ثواب کېلتیریشی حقیدهگی ترغیباتیدن تأثیرلنیب، درّه جزاسی اجرا اېتیلگن مراسمگه بارگن.
او شوندهی دېیدی: «طالبان محکوملرنی درّه اوریش اوچون آلیب کېلگنیده یورهگیم تېز اوره باشلهدی. کۉزلریم بیلن کۉرهیاتگن واقعهلرگه ایشانالمهدیم. اۉزیمگه: «بلکه توش کۉرهیاتگندیرمن»، دېدیم. قنییدی، اۉشه کونی او یېرگه بارمهگنیمده اېدی.»
اونینگ ایتیشیچه، اۉشه کونی جمعی 18 کیشیگه درّه جزاسی بېریلیشی رېجهلشتیریلگن اېدی، بیراق اولر آرهسیدهگی اوچ نفر عیال عامه آلدیگه چیقریلمهگن. قالگنلری 18 یاشدن 37 یاشگچه بۉلگن اېرککلر بۉلیب، اولر نینگ هر بیری 25 تهدن 39 تگهچه درّه بیلن جزالنگن.
سیدالله نینگ ایتیشیچه، اونینگ یقین دۉستلریدن بیری هم اۉغریلیک عیبی بیلن 39 درّه جزاسیگه حکم قیلینگن. دۉستی نینگ سۉزلریگه کۉره، ییگیرمنچی درّه ضربهسیدن کېین تنهسیدهگی آغریقنی دېیرلی سېزمهی قالگن و بوتون وجودی اوویشیب کېتگن.
سیدالله نینگ ایتیشیچه، درّه جزاسی باشلنیشیده ستدیونده جوده کۉپ آدم تۉپلنگن اېدی. اما تۉرت نفر محکوم جزالنگندن سۉنگ، کۉپچیلیک فوتبال ستدیونینی ترک اېتگن و تماشابینلر سانی سېزیلرلی درجهده کمهیگن.
اونینگ سۉزلریگه کۉره، طالبان تدبیر اشتراکچیلرینی درّه جزاسی اجرا اېتیلهیاتگن پیتده نه صورتگه آلیش، نه ویدیو یازیب آلیش ممکنلیگی حقیده آگاهلنتیرگن. اگر کیمدیر بو کۉرستمهگه عمل قیلمسه، اونینگ اۉزی هم جزالنیشی ایتیلگن.
درّه جزاسی حکمی طالبان رهبری ادارهسیدن تصدیقلنهدی
قندهاردهگی طالبان صفیدهگی خبردار منبع نینگ اطلاعات روزگه معلوم قیلیشیچه، طالبان محکمهسی درّه جزاسی حقیده حکم چیقرگچ، اونی تصدیقلش اوچون ملا هبتالله آخوندزاده، طالبان رهبری ادارهسیگه یوبارهدی. اگر رهبر حکمنی تصدیقلهسه، محکوملرگه نسبتاً درّه جزاسی اۉن کون ایچیده عامه آلدیده اجرا اېتیلهدی.
منبع نینگ ایتیشیچه، جزا اجراسیدن اوچ کون آلدین طالبان نینگ اخبارات و مدنیت ادارهسی، طالبانگه علاقهدار یېتکرمه و اجتماعي ترماقلر همده گروه طرفدارلری درّه جزاسی اۉتکزیلهدیگن جای حقیده اعلان بېریب، آدملرنی تماشا قیلیش اوچون کېلیشگه چقیرهدی.
اونینگ سۉزلریگه کۉره، حتا جزا اجراسیدن بیر ساعت آلدین هم قندهار شهریدهگی مسجدلر نینگ آواز کوچهیتیرگیچلری آرقهلی مراسم نینگ وقتی و جایی اعلان قیلینهدی، شونده آدملر تدبیرده اشتراک اېتیشلری ممکن بۉلهدی.
منبع شوندهی دېدی: «آدملر سپورت ستدیونیگه ییغیلگچ، اوّلا طالبان علمالری قریب۴۰ دقیقه دوامیده درّه جزاسی نینگ اجرا اېتیلیشی یخشی اېکنلیگی حقیده معروضه قیلهدیلر. شوندن سۉنگ محلي محکمه رئیسی و ولایت حاکمیتی وکیلی۱۰ دقیقهدن نطق سۉزلهیدی. کېین مخصوص قیسقه کییم کيدیریلگن و میدانگه آلیب چیقیلگن محکوملر جزالنهدی.»
منبع نینگ تأکیدلشیچه، آدملر درّه جزاسی اۉتکزیلهدیگن جایگه کیریشده طالبان کوچلری تامانیدن تۉلیق تینتوو قیلینهدی. اگر اولرده سمارت فون بۉلسه، صورتگه آلیش و ویدېو تصویرگه توشیریش نینگ آلدینی آلیش مقصدیده تېلفونلری وقتینچه آلیب قۉییلهدی.
او ینه شوندهی دېدی: «اگر کیمدیر درّه جزاسی اجرا اېتیلهیاتگن پیتده صورتگه آلسه یاکه ویدېو یازسه، اۉشه زهاتی حبسگه آلینهدی و عامه آلدیده جزالنهدی. شو سببلی آدملر قۉرقهدی و مراسمنی تصویرگه آلیشگه جرعت اېته آلمهیدی.»
تماشابینلر سانی کمهیماقده
شونگه قرهمهی، قندهارده محکوملرنی درّه بیلن جزالش مراسملرینی تماشا قیلیشگه بۉلگن قیزیقیش کمهییب بارماقده. قندهارلیک محمود اطلاعات روزگه ایتیشیچه، اوّلگیگه قرهگنده بوندهی مراسملرنی تماشا قیلیش اوچون بارهیاتگن آدملر سانی انچه آزهیگن.
او شوندهی دېدی: «آدملرنینگ آنگی آشدی و اولر طالبان جزالرینی اۉز کۉزلری بیلن کۉریشنی ایستهمهیپتی. بیر ییل اوّلگی حالتدن فرقلی روشده، درّه جزاسینی کۉریش اوچون ستدیونگه بیر مرته بارگنلر نینگ۸۰ فایزی کېینچهلیک بوندهی مراسمگه باشقه هېچ قچان بارمهیدی.» او آدملرنی طالبانگه قرشی ناراضیلیگینی نمایان اېتیش اوچون درّه جزاسی مراسملریده اشتراک اېتمسلیککه چقیردی.
محمود ینه شوندهی دېدی: «مېنیمچه، کیمکه چینهکم انسان بۉلسه، بو جزالرنی کۉریش اوچون هېچ قچان بیر مرتهدن آرتیق بارمهیدی. آدملر بیرینچی سفر فقط قیزیقیش طفیلی نیمه بۉلهیاتگنینی کۉریش اوچون باریشهدی، اما اوندن کېین باشقه بارمهیدیلر.»
طالبلر رهبری ملا هبتالله آخوندزاده ۱۴۰۱-هجري قویاش ییلی نینگ عقرب آییده قندهار شهریده طالبان نینگ بیر گروه قاضیلری بیلن اوچرهشووده اولرگه افغانستان بۉیلب «حد و قصاص» حکملرینی اجرا اېتیشنی بویورگن اېدی.
اوشبو کۉرسهتمهدن سۉنگ طالبان بیر نېچه کیشینی عامه آلدیده قتل اېتدی، شونینگدېک یوزلب محکوملرگه نسبتاً درّه جزاسینی آچیق طرزده اجرا قیلدی. طالبلر حکومتی تامانیدن «حد و قصاص» جزالری نینگ قۉللنیلیشی خلقارا همجمعیت و انسان حقوقلری فعاللری تامانیدن کېسکین تنقید قیلینیب، بو عملیاتنی تۉختهتیشگه چقیریلگن. بیراق طالبان حکومتی مطبوعات سۉزلاوچیسی ذبیحالله مجاهد خلقارا همجمعیت طالبلرنینگ ایچکی ایشلریگه ارهلشمسلیگی کېرهکلیگینی آچیق بیان قیلگن.
شونگه قرهمهی، طالبان تامانیدن «حد و قصاص» جزالرینی اجرا اېتیش بیلن باغلیق اېنگ جدّي خواطرلردن بیری شوندهکی، عیبلنووچیلر عادل محکمه لر جریانی و اۉز ایشلرینی عدالتلی کۉریب چیقیش حقوقیدن یېترلی درجهده فایدهلنه آلمهیپتی.
