ایران-افغانستان تېمیر یۉل یۉلهگی مدیری مصطفی رضايینینگ معلوم قیلیشیچه، ایلک بار ترانزیت یوک چیندن تۉغریدن-تۉغری، یۉل دوامیده قَیته توشیریش و آرتیشسیز اېران تېمیر یۉل ترماغی آرقهلی افغانستانگه یېتکزیلدی.
ایلنا خبرگزارلیگی خبریگه کۉره، رضايینینگ ایتیشیچه، یوک۵۰۰ تُن «امدیاف» پلیتهلریدن عبارت بۉلیب، پکیندن چین تېمیر یۉل ترماغی آرقهلی جۉنهتیلگن. یوک تورکمنستان آرقهلی ایران تېمیر یۉل ترماغیگه کیریب، سۉنگ خواف-هرات تېمیر یۉل یۉلهگی آرقهلی هرات ولایتیدهگی روزنک ستشنیگه یېتکزیلگن.
رضايی بو بجینگ-هرات یۉنهلیشی بۉییچه ایران اسلام جمهوریتی تېمیر یۉلی ترماغی آرقهلی عملگه آشیریلگن ایلک تۉغریدن-تۉغری تېمیر یۉل ترانزیتی اېکنینی تأکیدلهدی.
اونینگ سۉزلریگه کۉره، یوکنی دېنگیز و تېمیر یۉل ترانسپورتینی بیرلشتیرگن حالده تشیش اوّلگی عادتي یۉنهلیشلرگه نسبتاً تشیش وقتی همده خرجتلرینی سېزیلرلی درجهده کمهیتیرگن و اوشبو یۉلک نینگ رقابتبرداشلیگینی آشیرگن.
مصطفی رضايینینگ ایتیشیچه، مذکور رېل قتناوینینگ یۉلگه قۉییلیشی خواف-هرات تېمیر یۉل یۉلهگی سودا و ترانزیت عملیاتلرینی رواجلنتیریش باسقیچیگه کیرگنینی کۉرسهتهدی. اونینگ تأکیدلشیچه، اوشبو یۉنهلیش آرقهلی یوک حجمی آرتگنی سری ایران نینگ شرقي آسیا، مرکزي آسیا و افغانستاننی باغلاوچی ترانزیت حلقهسی صفتیدهگی اۉرنی مستحکملنهدی.
او ینه قید اېتیشیچه، خواف-هرات تېمیر یۉل یۉلهگی تورلی ترانزیت یوکلرنی قبول قیلیش امکانیتیگه اېگه بۉلیب، منطقوي همکارلیک کېنگهیسه، چین، مرکزي آسیا، ایران و افغانستاننی باغلاوچی مهم ترانسپورت یۉنهلیشلریدن بیریگه ایلنیشی ممکن.
خواف-هرات تېمیر یۉلینینگ عمومي اوزونلیگی۲۲۶ کیلومتر بۉلیب، شوندن۷۷ کیلومتری ایرانده،۱۴۹کیلومتری اېسه افغانستانده جایلشگن.
مذکور تېمیر یۉلنینگ ایراندهگی ایکّی قِسمی و افغانستاندهگی اوچینچی قِسمی قوریب بیتکزیلگن.
تۉرتینچی قِسم اېسه۴۳ و۴۷ کیلومترلیک ایکّی باسقیچدن عبارت بۉلیب، یکونده هرات صناعت پارکیگچه یېتیب بارهدی. طالبان معلوماتیگه کۉره، حاضر بیرینچی باسقیچ قوریلیشی دوام اېتماقده، او یکونلنگچ، ایکّینچی باسقیچ قوریلیشی هم باشلنهدی.
افغانستاندهگی تېمیر یۉل قوریلیشی حلی تۉلیق یکونلنمهگنیگه قرهمهی، ایران یوکلری اوشبو یۉنهلیش آرقهلی روزنک ستشنیگچه منتظم یېتکزیب کېلینماقده.
