افغانستاندهگی چېگرهسیز شفاکارلر وکالتخانهسی بلخ ولایتیده۲۸ یاشلی آنه بېش اېگیزهکنی دنیاگه کېلتیرگنینی معلوم قیلدی.
تشکیلات بوگون، دوشنبه (۲۹-سرطان) اعلان قیلگن بیاناتیده، چقهلاقلر مزار شریف شهریدهگی ابو علی سینا شفاخانهسیده توغیلگنینی بیلدیردی.
چېگرهسیز شفاکارلر معلوماتیگه کۉره، چقهلاقلر سکّیز کون اوّل توغیلگن بۉلیب، حاضرگچه ینگی توغیلگن چقهلاقلر اوچون مۉلجللنگن ویژه مراقبت بۉلیمیده سقلنماقده.
چقهلاقلرنینگ آنهسی۲۸ یاشلی نفیسه حسابلنهدی. اونینگ ایتیشیچه، فرزندلری دستلبکی کونلرده آنه سوتینی اېمالمهگن، اولردن بیری اېسه آغیر احوالده بۉلگن.
نفیسه فرزندلریدن بیرینی یۉقاتیشدن خواطرده اېدی. کېینچهلیک شفاکارلر بېش چقهلاق نینگ برچهسیده قوسیش و سریقلیک علامتلری انیقلنگنینی معلوم قیلیشدی.
بیراق شفاخانه نینگ ینگی توغیلگن چقهلاقلر مراقبت ویژه بۉلیمی اوزلوکسیز پرورش و مخصوص دوالش آرقهلی اولر نینگ احوالینی نظارت آستیگه آلدی. حاضرده بېش چقهلاق نینگ ساغلیگی یخشیلنیب بارماقده.
کۉپ اېگیزهکلی توغروقلر کم اوچرهیدیگن حالت بۉلسه-ده، سۉنگگی تۉرت ییل ایچیده افغانستانده کمیده بېشته تۉرت اېگیزهک و بېش اېگیزهک توغیلیشی عامهوي اخبارات واسطهلریده یاریتیلگن.
