خوست ولایتیدهگی منبعلرنینگ معلوم قیلیشیچه، یقینده امریکا قۉشمه ایالتلریدن قَیتگن سابق حکومت نینگ مخصوص کوچلری اعضاسی قوراللی شخصلر تامانیدن اۉلدیریلگن.
منبع نینگ ایتیشیچه، اوشبو سابق حربي ننگيالی اسملی بۉلیب، خوست مرکزیدهگی متون منطقهسی اهالیسی اېدی. او جمهوریت دوریده خوستنی حمایه قیلیش مخصوص کوچلری (کاپیاف) صفیده خدمت قیلگن. مذکور کوچلر امریکا اطلاعات تشیکلاتی(سیا) بیلن همکارلیگی بۉلگن
منبعگه کۉره، ننگيالی بیر نېچه کون آلدین امریکا اوییگه قَیتگن و یکشنبه (۲۸سرطان) کونی خوست شهریده نامعلوم قوراللی شخصلر تامانیدن آتیب اۉلدیریلگن.
طالبلرنینگ خوست ولایتی امنیه قوماندانلیگی هم سابق حربي نینگ اۉلدیریلگنینی تصدیقلب، واقعه شخصي عداوت عاقبتیده صادر بۉلگنینی بیلدیردی. بیراق منبعلر ننگيالی نینگ هېچ کیم بیلن عداوتی بۉلمهگنینی تأکیدلهماقده.
طالبلر امنیه قوماندانلیگینینگ نشر قیلگن بیاناتده ایتیلیشیچه، ننگيالی یکشنبه کونی خوست شهریدهگی ابدالي شفاخانهسی قرشیسیده دشمنلری تامانیدن اۉققه توتیلگن.
او خوست مرکزیدهگی متون منطقهسی نینگ خباش خیل منطقهسیده یشهگن.
طالبلر امنیتی ادارهسی معلوماتیگه کۉره، ننگيالی جمهوریت قولهگنیدن کېین امریکاگه کېتگن و تخمیناً۱۰کون آلدین افغانستانگه قَیتگن اېدی.
طالبلر رسميلری واقعه یوزهسیدن تېرگاو آلیب باریلهیاتگنی و قاتللیکده گمان قیلینهیاتگن شخصلرنی قۉلگه آلیش چارهلرینی کۉرهیاتگنینی معلوم قیلدی.
یقینده دایکندی ولایتیده هم سابق ملي خوفسیزلیک خادملریدن بیری اۉلدیریلگنی خبر قیلینگن اېدی.
سۉنگّی بېش ییل دوامیده کۉپلب سابق حربيلر سِرلی طرزده اۉلدیریلگن. بو قاتللیکلرده طالبلر اعضالری عیبلنماقده، بیراق گروه اۉز یېتکچیسینینگ عمومي عفو حقیدهگی فرمانیگه عمل قیلهیاتگنینی ادعا قیلیب کېلماقده.
