فلسطیننینگ حماس گروهی خلیل الحیهنیاۉزینینگ ینگی سیاسي ادارهسی باشلیغی اېتیب سیلنگنینی معلوم قیلدی.
الجزیره خبریگه کۉره، حماس بوگون (دوشنبه، ۲۹-سرطان) خلیل الحیه ایچکی سیلاونینگ ایکّینچی باسقیچیده گروهنینگ سابق سیاسي رهبری خالد مشعل اوستیدن غلبه قازانگنینی بیلدیرگن.
خلیل الحیه ۲۰۲۴-ییل اکتوبر آییده اسرایل نینگ غزهدهگی هجومیده هلاک بۉلگن یحیی سنوارنینگ اۉرنینی اېگهلهدی.
او ۱۹۸۷-ییلده حماس تشکیل اېتیلگنیدن بویان گروه اعضاسی بۉلیب کېلماقده و حاضرده اونینگ رهبریت کېنگشیدهگی بېش اعضادن بیری حسابلنهدی.
اسماعیل هنیه، یحیی سنوار و محمد ضیفکبی حماسنینگ یوقاری مرتبهلی سیاسي و حربي رهبرلری هلاک بۉلگنیدن سۉنگ، خلیل الحیه نینگ گروهدهگی تأثیری ینه-ده کوچهیدی.
او ییللر دوامیده اسرایل هجوملری عاقبتیده عایلهسینینگ بیر نېچه اعضاسیدن اَیریلگن. جملهدن، ۲۰۲۵ییل سپتامبر آییده قطر پایتختی دوحهدهگی حماسگه علاقهدار مجموعهگه اویوشتیریلگن هجومده اونینگ اۉغیللریدن بیری هلاک بۉلگن.
ینه بیر اۉغلی اېسه ۲۰۱۴-ییلده اسرایلنینگ غزهدهگی اوییگه اویوشتیرگن هجومیده هلاک بۉلگن اېدی.
شونگه قرهمهی، اونینگ دوحهده بۉلیشی غزه قملیدن کېلیب چیقهدیگن چېکلاولرسیز تورلی دولتلرگه سفر قیلیش و اولرنینگ رهبرلری بیلن اوچرهشیش امکانینی بېرگن. خلیل الحیه، شونینگدېک اسرایل بیلن اۉت آچیشنی تۉختهتیش بۉییچه مذاکرهلرده حماس هیاتیگه هم رهبرلیک قیلیب کېلگن.
