افغانستاننینگ بیرلشگن ملتلر تشکیلاتیدهگی نمایندهلیگی سرپرستی نصیر احمد فایق بیرلشگن ملتلر تشکیلاتینی نورستاندهگی سېل آفتیدن جبر کۉرگنلرگه کۉرسهتیلهیاتگن حیاتي یاردمنی آشیریشگه چقیردی.
فایق بوگون (چهارشنبه، ۳۱سرطان) نشر قیلگن بیاناتیده اوشبو فاجعه قربانلریگه همدردلیک بیلدیردی.
افغانستاننینگ بیرلشگن ملتلر تشکیلاتیدهگی نمایندهلیگی سرپرستی احتیاجلرنی بهالش و شاشیلینچ یاردم یېتکزیش اوچون تینیمسیز فعالیت آلیب بارهیاتگن انسانپرورلیک قوتقروو خادملری نینگ سعی-حرکتلرینی یوقاری بهالهدی.
او شوندهی دېدی: “بیرلشگن ملتلر تشکیلاتی ادارهلری و انسانپرور همکارلردن ضرر کۉرگن جماعهلرگه حیاتي ضرور یاردمنی زودلیک بیلن کېنگهیتیریشنی سۉرهیمن.”
هلاکتلی و ویرانکار سېل دوشنبه کونی کېچقورون افغانستان شرقیده یوز بېردی. طبيعي آفتدن نورستان، ننگرهار و لغمان ولایتلری ضرر کۉردی.
سېل اېنگ کۉپ انساني تلفات و مادّي ضررلرنی نورستان ولایتی نینگ مرکزی پارون شهریده کېلتیریب چیقردی. طبيعي آفتلرگه قرشی کورهش ادارهسی معلوماتیگه کۉره، حاضرگچه۲۳ کیشی نینگ هلاک بۉلگنی،۸۰ کیشی نینگ یرهلنگنی تصدیقلنگن،۱۰۰ گه یقین کیشی اېسه هنوز بېدرَک یۉقالگن حسابلنهدی.
