خلق ارا عفو تشکیلاتی پاکستاننینگ کابلدهگی «اميد» گیاهوندلیکدن دوالش مرکزیگه اویوشتیرگن هجومی «احتمالي اوروش جنایتی» صفتیده تېرگاو قیلینیشی کېرهکلیگینی بیلدیردی.
تشکیلات سهشنبه کونی (۳۰-سرطان) نشر قیلگن گزارشیده سۉنگگی تۉرت آی دوامیده آلیب باریلگن کېنگ قمراولی تېکشیروولر دوامیده پاکستان نینگ «اميد» مرکزی حربي مقصدلرده فایدهلنیلگن دېگن دعواسینی تصدیقلاوچی هېچ قندهی دلیل تاپیلمهگنینی معلوم قیلدی.
خلقارا عفو تشکیلاتی اوشبو هجوم طبیات مؤسسهلرینی علیحده حمایه قیلووچی خلق ارا قاعدهلرنی بوزگنینی و مستقل تېرگاو همده جوابگرلیک بۉلمهسه، عملدهگی ماجرالرده جزاسیزلیک محیطینی ینه-ده مستحکملشی ممکنلیگینی تأکیدلهدی.
کابلدهگی «اميد» مرکزی اۉتگن هجري-شمسي ییل نینگ ۲۵-حوت کونی پاکستان اوردوسی تامانیدن بامباردمان قیلینگن اېدی. خلقارا عفو تشکیلاتی معلوماتیگه کۉره، هجوم عاقبتیده۲۶۹ نفر تینچ اهالی هلاک بۉلگن.
اۉشه پیتده پاکستان اخبارات وزیری عطاءلله تارر مملکتی اوردوسی کابلدهگی ایکّی جایده، جملهدن«اميد»مرکزیده،» تخنیکي قۉللب-قوّتلش آستقورمهسی و اۉق-داری انبارلرینی نشانگه آلگنینی ایتگن اېدی.
اونینگ دعوا قیلیشیچه، ایکّیلمچی پارتلشلر ییریک اۉق-داری انبارلری اوریلگنینی کۉرستگن.
خلقارا عفو تشکیلاتی تېکشیروو دوامیده۶۰ دن آرتیق فوتو و ویدېونی،۳۰ ته صنعي یۉلداش تصویرینی همده هجومدن آلدینگی ویدېولرنی تحلیل قیلگن. شونینگدېک، «اميد» مرکزی نینگ سابق و عملدهگی خادملری، قۉشنی ابن سینا شفاخانهسی خادملری، قوتقروو ایشلریده قتنهشگنلر و قربانلر عایله اعضالری بیلن۱۱ ته اینتېرویو اۉتکزیلگن.
تشکیلات نینگ ایتیشیچه، تېکشیروو دوامیده «اميد» مرکزی هجوم وقتیده قورال-یراغ یاکه اۉق-داریلرنی سقلش یاخود باشقه حربي مقصدلرده فایدهلنیلگنینی تصدیقلاوچی هېچ قندهی دلیل تاپیلمهگن.»
خلق ارا عفو تشکیلاتینینگ جَنوبي آسیا بۉییچه منطقوي مدیری ایزابل لاسی اوشبو هجوم خلق ارا انسانپرور حقوقنینگ جدّي بوزیلیشی بۉلیب، احتمال اوروش جنایتیگه تېنگ اېکنینی ایتدی.
اونینگ سۉزلریگه کۉره: «اۉن ییلدن آرتیق وقت دوامیده اميد مرکزی طبیات مؤسسهسی صفتیده فعالیت یوریتگنی حقیده کېنگ معلوماتلر موجود. اونگه قیلینگن هجوم پاکستان نینگ حربي رېجهلشتیریشیده کتّه موفقیتسیزلیک بۉلگنینی کۉرسهتهدی.»
ایزابل لاسی پاکستان حکومتینی یېترلی دلیللر موجود بۉلسه، قوماندانلیک جوابگرلیگی تمایلی اساسیده هم برچه گماندارلرنی جنایي جوابگرلیککه تارتیشگه چقیردی.
پاکستاننینگ افغانستانگه هوا هجوملری ۲۰۲۵ییل آکتبر آییده طالبان بیلن یوز بېرگن چېگرهوي تۉقنهشوولردن سۉنگ باشلنگن.
بیرلشگن ملتلر تشکیلاتی نینگ افغانستاندهگی یاردم ادارهسی (یوناما) معلوماتیگه کۉره، اۉتگن ییلدن بویان پاکستان نینگ هوا هجوملری عاقبتیده۷۵۰ نفردن آرتیق تینچ اهالی جبرلنگن، جملهدن۳۷۲ کیشی هلاک بۉلگن و۳۹۲ کیشی یرهلنگن.
پاکستان نینگ اېنگ سۉنگّی هلاکتلی هوا هجومی اۉتگن آی پکتيا ولایتی نینگ سمکنی تومنیده صادر بۉلگن. یوناما حساباتیگه کۉره، اوشبو هجومده۲۸ نفر تینچ اهالی هلاک بۉلگن، ینه۴۹کیشی جراحتلنگن.
